“Normalmente nos no ta comparti e mesun ideologia ni e mesun vision di con ta hiba nos isla padilanti. Pero awe mi mester bisa cu mi ta totalmente di acuerdo cu e fraccion di MEP den Parlamento”, asina mr. drs. Arthur Dowers, miembro di Parlamento di AVP a duna di conoce na final di e reunion di Parlamento awe. Minister Otmar Oduber a yama e reunion, pa papia riba e proyecto di Vierbaansweg. Pero e resultado di e reunion no tabata manera Oduber a spera.
“En bes cu e Minister a spera di haya un aprobacion of sosten di Parlamento, el a haya un mocion cu basicamente a pone bou di curatela”, asina Arthur Dowers a splica. “Mi ta haye bon si, pasobra MEP, den apenas 3 luna di tempo, ya a ripara cu no por confia Otmar Oduber y a percura pa mara su mannan”, segun e Parlamentario.
Locual a pasa ta cu Otmar Oduber a purba organisa un show den Parlamento. Di un banda e ta bisa cu e proyecto ta casi cla y cu no tin nada, anto di otro banda e kier negocia cu e compania. Ta straño cu ta bin pidi Parlamento aprobacion pa atende cu un compania cu Bo tin contract cune. E pret sinembargo ta cu MEP a traha un mocion den cual ta bisa Oduber cu e por inicia negosacion pero e mester bin Parlamento bek pa pidi apoderacion pa tuma decision.
Cu e mocion aki riba mesa, Minister Otmar Oduber awor mester raporta na Parlamento riba tur asunto cu tin di haber cu e proyecto di Green Corridor. “Aunke e no ta legal e forma aki, toch mi ta contento cu e fraccion di MEP a mara man di e Minister, pa evita cu e ta tuma cualkier decision. Mi a echt kere cu lo dura un poco mas prome cu mara su mannan, pero mi ta contento cu nan a haci’e caba”, segun Arthur Dowers.
