Ex minister di husticia y parlamentario Arthur Dowers, a habri su disertacion durante di un conferencia di prensa di partido AVP, cu un felicitacion na Cuerpo Policial y cuerpo di husticia, cu e detencion di e sospechoso di asesinato na De Vuyst. Ta importante pa accentua cu un tremendo trabao a wordo haci y ta importante tambe pa trece padilanti cu a observa cu den e caso aki, dado momento tabata tin metemento di personanan liga na partido MEP, den parlamento den e asunto di investigacion. Ta manda un advertencia na direccion di partido MEP, cu nan tin cu stop di mete den husticia y obstruccionnan policial. Esaki por duna un consecuencia cu por stroba un investigacion.
Na momento cu e incidente aki a tuma luga y a keda conoci cu un persona a bira victima di asesinato, Cuerpo policial mesora, na un moda masha profesional, cual den e ultimo añanan aki den un forma structura, ta traha un team, unda cu nan ta hinca diferente experto den dje y asina ey, tuma tur nan tempo pa analisa full e proceso.
Pa un caso asina aki ta importante, pa e investigacion tin cu wordo haci den tur trankilidad, pero tambe percura pa nada no bay fout pa bo por perde credibilidad den e caso of por perde e caso den corte, na momento cu presente.
E Parlamentario a indica cu ta importante pa duna indicacion hopi cla, cu for di su propio experiencia di husticia, no ta na su luga, cu un persona liga na gobierno y sigur no miembro di parlamento, mete den e caso. Tin di compronde cu e persona aki ta hopi cerca di esnan cu ta famia, pero toch por mira cu e persona sospechoso tambe ta meti, ta cerca di nan, ta un cos hopi robes loke a tuma luga, cu metemento politico di e persona aki.
Ta importante pa accentua e bon trabao cu a wordo haci di parti di Cuerpo Policial, pa mustra riba e hecho cu Cuerpo Policial ta ekipa pa atende cu e tipo di casonan aki pa trece nan na un final exitoso.
Ta spera cu Cuerpo Policial ta keda traha den e mesun forma motiva y dedica cu nan a bin ta haciendo den e ultimo añanan. Dowers semper a mustra su confiansa den e cuerpo. Awo tin un gobierno diferente, cu nunca a demostra, pasobra nan a critica husticia y Cuerpo pa 8 aña largo, den un forma feroz, inclusive e minister di husticia. Awo poco poco nan ta guliendo nan palabra y ta baha pisa. Nan tin cu bebe hopi awa pa e baha. Pero nan tin cu admiti cu Cuerpo Policial cu nos tin ta un Cuerpo Policial cu a crece y bay na un nivel asina profesional, cu ta logra soluciona e casonan cu ta tuma luga na nos pais.
Ta asina ey cu tin casonan cu no por preveni. No por preveni tur maldad cu ta pasa tras di porta cera. No por preveni tampoco tur maldad cu ta wordo haci riba caya. Pero si ta asina cu na momento cu algo pasa, Cuerpo Policial ta yega na e solucion di dje y yega na conclusionnan satisfactorio. Ta hopi importante ta cu e hecho cu Cuerpo Policial tin e posibilidad, e capacidad, e material, pa soluciona e casonan aki y tin tempo relativamente cortico tin biaha, ta buta tambe cu e confiansa ta subi den e cuerpo, pero tambe e motivacion cerca e criminalnan pa comete crimen, ta baha.
