Arthur Dowers: Minister Lampe mester ta honesto y acepta su fracaso cu su maneho

Miembro di fraccion di AVP, sr Arthur Dowers a reacciona riba declaracionnan haci pa Minister Rudy Lampe, kende siman pasa a acusa Partido AVP di no a haci algo nunca pa ‘speciaal onderwijs’ y cu AVP a falta respet pa sector aki.

“Pa un homber asina bon educa, dr Lampe mester por sa miho cu 10 aña pasa cu mi persona tabata Minister di Enseñansa, gobieno di AVP a introduci e sector di ‘speciaal onderwijs’ pa atende un situacion cu no tabata adecuado ora cu e hobennan aki tabata atende EPB.

Nan no tabata ricibi e atencion adecuando na e scol aki y a lanta un un scol pa e grupo di hobennan aki y a traha un scol nobo caminda nan por ricibi e atencion y educacion adecuado pa asina nan ta haya un educacion segun nan capacidad y cu tabata algo hopi importante mes.

Ta bin acerca cu Minister Lampe tin varios partner den su gobierno cu a forma parti di e proceso aki, kenddenan a sostene e proyecto aki, kendennan tabata forma parti di e plan aki cu a yuda e hobennan aki den e forma cu tabata necesario.
Si Lampe ta criticando e proceso aki e tin cu papia cu e coleganan di gobierno aki, trata di haya informacionnan corecto prome cu e lansa cierto acusacionnan sin base y sin sentido.
Hecho ta keda cu Minister Lampe nunca ta sincero cu e grupo di maestronan den enseñansa ya cu den reunionnan cu el a yega di sostene cu maestronan y na cual mi persona tambe a asisti, el a elogia e plan di gobierno di AVP, entre otro e curiculum ontwikkeling, bisando cu e ta ehecutando e plan aki.

Sinembargo den otro reunion sosteni cu e grupo aki, e ta bisa cu e lo introduci un curiculum nobo y cu e lo informa e grupo di esaki dentro di dos siman loke te dia di awe esaki no a sosode.
Un dia e ta elogia e hecho cu AVP a construi un scol nobo pa e hobennan aki pero despues ta bin papia cu nos a perde respet pa speciaal onderwijs, pues completamente bruha y confirmando cu e no tin nocion di kico e tin cu haci cu enseñansa.
Ora cu Lampe papia cu e meta di AVP ta di baha gobierno pero aki tin cu mustra un declaracion di ex Prome Minister Nelson Oduber, kende den pasado a bisa cu cu ‘elf min een is nul’ pero den e caso aki cu salida di Lampe, e gobierno aki ta sigui na bida.
AVP no tin interes di baha gobierno, ya cu ta tres partido cu a dicidi di uni nan mes y haci loke nan kier contra pueblo y nan tin cu para responsabel pa e maneho cu nan ta hibando y no bin conta storianan y insinua cu ta AVP kier crea problema.

Lampe ta responsabel pa e desaster cu e a haciendo den enseñansa y ta mas cu claro cu no por permiti su persona sigui cu e destruccion aki, ya cu tanto interes di maestronan como interes di studiantenan ta den wega.
Si conseho di Minister cu Lampe mes ta forma parti di dje ta anuncia publicamente cu nan a kita Tra’i Merdia for di su persona, ta bisa hopi di su maneho cu e ta hibando y sin duda tabata un motibo cla cu e mester saca su conclusion cu esaki pero no bin hunga weganan sin sentido como sifuera cu AVP ta tras di e desaroyonan cu ta tumando luga.

No tin confiansa den e sector di enseñansa den Rudy Lampe y e unico culpabel di tur loke ta pasando ta su persona mes y di su gobierno cu a uni hunto pa goberna e pais pero mas tanto ta gobernando pa nan grupo di privilegiadonan y ta pueblo tin cu husga nan ora cu e momento yega cu esaki tin cu sosode,” Parlamentario Arthur Dowers a declara.