Biblioteca Nacional hunto cu artistanan ta presentando diamars e ultimo evento pa e aña’ki di arte contemporaneo. Esaki ta tuma luga den colaboracion cu e organisacion Plataforma Aruba.
Bunita di e evento aki cu ta tuma luga di 5.30 di atardi pa 7.30 di anochi na Biblioteca Nacional ta cu e presentacion lo ta uno en vivo di e artista local Natusha Croes. E tema ta “Performance Art” di cual ta duna un splicacion kico tur e ta encera y dunando e ehempel ta bay tin e presentacion en vivo di Natusha. Na final, esnan presente tin e oportunidad di haci pregunta na e artista.
Arte Contemporanea den BNA a bini den cooperacion cu Plataforma Aruba pa brinda mas informacion na e publico general di arte contemporaneo. Rond di e tema aki a organisa diferente evento chikito. Cualkier persona cu ta curioso riba e tema aki, ta wordo invita pa e evento special aki, y contribui di e forma aki na cultura.
Natusha mes ta hopi entusiasma pa por intercambia cu publico tur su conocemento riba arte contemporaneo. E artista aki a caba di haya su master den “Performance Making”, na Londen. E ta contento di por participa den un plataforma cu tin e meta pa educa ciudadanonan riba e tema di arte aki y den cual artistanan local cu a studia afo ta haya chens di comparti nan conocemento / experiencia. E evento ta presenta un accion di fluho continua di un artista pa mantene of eherce su carera na Aruba.
E artista aki ta un persona yena di pasion pa su cultura y en buskeda di e memoria di e cultura, via di un practica di artista. E ta gusta busca con uza arte pa progreso di comunidad. Natusha Croes ta conoci na Aruba y ta yiu di e fayecido artista Hildward Croes.