ARTBO su training pa faha preto tabata exitoso

Diasabra ultimo tabata tin training organisa pa ARTBO pa tur esnan cu ta den e fase pa haci examen pa 1 dan te cu 5 dan. E training a tuma luga na Scol Primario Kudawecha bou guia di Master Melvin Rasmijn y su asistente Joshmar Wever.

E Training a cuminsa for di 2’or te cu 6’or y mey di atardi y varios atleta di varios scol di Taekwondo na Aruba a asisti na e training. Master Melvin Rasmijn a splica y mustra tur cos cu ta parti di examen y di su origen. Hopi hende ta train sin sa pakiko of for di unda a crea e tecnica of for di unda Taekwondo a bin. Master Melvin Rasmijn a splica e 10 one stepnan y con nan ta hinca den otro y ki ora ta haci uso di e tecnica.

Durante e training Master Melvin Rasmijn a mustra con por kibra un caida ora bo ta bay cay. A haci e Poomseanan y a corigi esnan cu tabata haci esakinan fout. Master Melvin Rasmijn a repasa basicamente tur e examen stof cu nan mester sa dia di examen cu ta dia 8 di Juni 2019. Master Melvin Rasmijn a remarca cu cada persona cu ta bin pa examen pa faha preto mester sa tur cos cu a train y nan lo tin cu sigui esaki na nan scol of por acerca training na Noord Taekwondo Center ariba dialuna, diaranson y diabierna for di 5’or pa 6’or di atardi pa e chikitonan y 6’or pa 7’or di anochi pa e grandinan.

Na final di e training Presidente di Aruba Taekwondo Bond “ARTBO” Dr. Guaicaipuro Jimenez a gradici Master Melvin Rasmijn y Joshmar Wever pa nan cooperacion hunto cu tur e atletanan.

Comments

comments