Dia 3 di october venidero tin un activacion Urbano na San Nicolas organisa pa Art Rap Foundation cual yama ‘Di Pariba: Urban Culture’ cual lo bira un concentracion di talento di pariba di brug. Akinan tres tattoo artist, tres barbero hende muhe, y 12 barbero hende homber lo bini hunto pa brinda diferente servicio y producto unico. E evento lo tuma luga den publico habri den caya di San Nicolas.
“Esaki ta algo pa fiha San Nicolas como un destinacion caminda pueblo di Aruba por haya diferente servicio”, segun Nelson Gonzalez, Director di Art Rap Foundation. E fundacion su meta ta pa crea Art & Community Projects, stimula, pero tambe reinventa e concepto di con Aruba y mundo henter ta pensa di San Nicolas. E area ta mas cu djis un red light district y recuerdo di e refineria, e ta un destinacion cultural consistiendo di 77 nacionalidad cu ta biba den harmonia na San Nicolas. E meta di e actividad aki ta pa presenta talento urbano cu por diversifica e oferta di San Nicolas como destino economico pa Aruba.
E barberonan y tattoo artist lo presenta nan talentonan pa medio di crea diferente estilo riba espacio publico. Dus e barbero lo laga su negoshi un rato pa bini ariba caya y presenta su talento, y tambe pa diversifica su oferta y servicio cu e ta duna. E ta algo grandi y diferente pa San Nicolas cu hopi hende no ta haci hasta rond otro area di Aruba mes.
Henter di tur districto y tur parti di Aruba ta invita pa pasa cumisando for di 7’or di mainta te cu 12’or di merdia pa presencia un actividad unico cu ta showcase talentonan fenomenal riba nos isla.
