Armando Hessels: Sistema di Aruba ta permiti cualkier hende cay den corupcion gubernamental

rmand Hessels ta presidi un Fundacion cu a cuminsa na 2016 y a traha diferente rapport cu tin di haber cu integridad.

Asina den e rapportnan a colecta informacion cu tin di haber cu maneho di personal di Gobierno, administracion financiero, funcionamento di Parlamento, transparencia, maneho socio economico y integridad den Gobernacion. A traha 4 aña riba 6 rapport.

Tin un bon bista a base di e rapportnan ey con pa cualifica Gobernacion di Aruba. E unico cualificacion cu por duna ta cu structuralmente por papia di criminalidad gubernamental. Caracteristica di e gobernacionnan ta cu ta bay contra interes general di Aruba, dirigi riba mehoracion di interes personal y di Partido, y hopi maneho tabatin efecto negativo pa Aruba. Un di nan ta e debe grandi cu e isla tin. Tur esaki Armand Hessels ta bisa den un declaracion.

Nan conclusion ta cu tanten cu tin e sistema cu un Partido politico ta responsabel pa maneho di Aruba, no tin confiansa cu e situacion lo drecha. P’esey a propone pa bin cu un sistema unda no tin partido politico mas, pa motibo di conflicto di interes.

Pa loke ta e investigacionnan penal manera IBIS, Avestruz y Flamingo, e ta lamenta e nombernan uza. Nan ta duna e percepcion, door cu no ta parhanan di Aruba, cu ta trata di un excepcion. “Miho a uza nombernan manera Totolica, of Bariga Geel, pasobra corupcion ta algo hopi mas comun cu hendenan por imagina nan mes,” Hessels.

Den e declaracion cu ne, el a papia hopi cu no ta trata di excepcion, pero a bira hopi mas comun y e hendenan mester bira mas consciente di e situacion aki na Aruba. Esaki door di e Sistema cu ta duna e oportunidad pa comete corupcion y ken cu pone eynan lo cay den e trampa ey.