Pa hopi hende ta incomprendibel cu decenas di miyon Mericano ta guli e non sense y mentiranan (engaño!) cu presidente Donald Trump ta scupi tur dia. Manera su ponencia cu a comete fraude na gran escala durante e ultimo eleccion cu el a perde na un manera convincente. Hasta e cantidad di caso hudicial cu el a entama pa mustra su rason y cu ta keda rechasa di antemano pa falta di prueba, hunto cu sugerencia di media a yega y hende di su partido, no tin efecto riba su siguidonan. Nan ta mira e ‘echonan’ aki solamente como intento di un complot pa deshaci di nan Mesias. E pregunta ta si e mesun nengamento fanatico di echo y e siguimento a ciego di e propio lider/partido tambe ta existi na Aruba.
Hipocresia
Historia recien di Aruba ta yen di caso di e mesun tipo di hipocresia (engaño!) cu ta caracterisa e dos partidonan grandi. Djis pa menciona algun recien:
1. E aplicacion na gran escala di proyecto di PPP pa e ultimo ministro di Infrastructura di AVP cu poco prome -como parlamentario- a critica MEP ferozmente pa e uzo di PPP pa un solo proyecto, esta ‘Palacio di Husticia’ na Macuarima. Segun e, proyecto di PPP lo ta mucho costoso y masha facil pa practica corupcion…
2. Nombramento como ministro pa MEP di un ex-ministro di AVP-OLA, di cual su proyectonan (aeropuerto, haf, lucht- en zeebrieven, postkantoor, radar, Air Aruba, Fabela, etc.) a perhudica Aruba pa posiblemente mas di Afl. 100 miyon. Anteriormente, MEP a cualifica e proyectonan na un manera convincentemente como corupto. Pero a pordona y lubida tur esey despues cu e ex-ministro concerni a afilia su mes atrobe na e partido y a haya un recepcion caluroso como e yiu perdi.
3. E intencion bergonsoso pa enrikeciendo propio di un exponente importante di AVP pa medio di CITGO despues cu el a duna un aporte importante na e ‘diseño’ di un acuerdo ultra secreto cu varios criminal Venezolano.
4. Nepotismo na gran escala pa e gobierno di coalicion actual a pesar cu e ta predica bon gobernacion, transparencia y integridad.
5. E noticia alentador di e lider actual di AVP cu e y su compinchinan principal lo retira despues di e resultado decepcionante (pa nan!) di eleccion na 2017. Lamentablemente nada di esey a tuma luga ainda. Al contrario, asta e ex-ministro di Infrastructura cu ta e acusado principal den un investigacion penal, ta representa su partido den parlamento!
6. E ‘eliminacion’ di e ultimo ministro di Infrastructura di POR a pesar cu/pasobra(?) aparentemente el a duna contenido concreto na e enfokenan principal di e coalicion actual (bon gobernacion, transparencia y integridad) dor di expone posibel nepotismo y corupcion. Un k’e otro a tuma luga entre otro pa medio di un procedura hopi dudoso pa presidente di parlamento.
Hipocresia den punta dede
E dos partidonan mas grandi ta abusa extensamente di e (supuesto!) amnesia colectivo di comunidad di Aruba. Tanten cu nan ta den oposicion, nan ta mustra incansablemente como parlamentario riba e tantisimo casonan di nepotismo y (posibel) caso di corupcion di e contra partido(nan) na poder. Despues di cambio di poder nan sa asimila tur e fayonan, hasta na un manera pio. Den esey nan ta demostra di a siña pasobra nan ta logra miho pa tapa nan accionnan. Un bon ehempel di punta dede ta e acusacion di MEP na 2015 cu AVP a entrega autonomia di Aruba cu e acuerdo di supervision pa Hulanda. Awor cu MEP mester a firma un acuerdo mas limitativo ainda, AVP ta falta palabra pa acusa MEP di ‘entreguismo cu un acuerdo secreto(!)’, pa e propio famia di ‘e gran libertador’. Den esey, di mes AVP no ta duna ningun alternativa real pa scapa autonomia.
Mas engaño?!
Siguiendo su tradicion, AVP na e momento aki ta purba di gana bek su confiansa daña den comunidad. P’esey el a saca su ‘institucionnan cientifico’ for di cashi atrobe pa purba crea un imagen di seriedad. Riba dje e ta organisa reunion cu organisacion di comunidad pa ‘scucha, pensa y recupera miho’. Aparentemente pa pone e gruponan concerni lubida e experencianan negativo durante e ultimo gobernacion di AVP. Pero tin poco expectativa cu AVP lo por cambia asina radical cu e mesun politiconan pa merece credibilidad atrobe.
Burico?!
E pregunta grandi ta si comunidad di Aruba lo husga e partidonan politico segun echo concreto of -entre otro pa motibo di un cultura limita di lesa – solamente a base di propaganda politico. Den e ultimo caso, mescos cu e fanaticonan di Trump, lo no reconoce e gran cantidad di ‘eror’, engaño y otro mal comportacion di ‘nan’ lider/partido y/of lo tapa tur e cosnan ey bou di un capa di amor pa motibo di ‘laso emocional’. Òf…e berdad simplemente ta mucho fastioso mientras cu e mentiranan mucho atractivo! Si pueblo dal su pia atrobe na mesun piedra, e chens ta grandi cu e partidonan cu a causa e situacion catastrofal di Aruba prome cu e pandemia di COVID a yega, lo por bin na poder atrobe y sigui nan custumber tradicional di mal gobernacion. Lo por saca e conclusion cu partido asina simplemente ta haci locual un mayoria di pueblo ta spera di nan. Den e caso ey, en berdad e mayoria ey no ta merece miho!
