Den varios ocasion tanto gobierno como e operador nobo desea (Quanten) di e tereno industrial inmenso na San Nicolas a duna di conoce cu na mita di luna di mei lo anuncia si a logra realisa financiamento di e ‘reemplaso ultramoderno y super limpi’ di e bulto di frusto actual. Siguientemente a hala mita di mei atras pa fin di mei. Despues a sigui un silencio ensordecedor, segun Armand Hessels di Stichting Deugdelijk Bestuur Aruba.
Era di piedra
En realidad e escogencia di RdA/Gobierno pa e proyecto di Quanten ta incompredibel. Cu e polucion enorme riba tera, na laman y den aire pa e refineria anticua di Esso y e problemanan di salud inevitable cu (t)a resulta di esey, un ripiticion, aunke sea riba un escala menor, ta un imagen espantoso. Specialmente den un mundo cu hustamente pa motibo di e uzo intensivo di crudo como fuente di energia a susha increiblemente, asta cu consecuencia climatologico serio. E echo cu e isla turistico Aruba kier aporta conscientemente n’esaki ‘pa mehora su resiliencia economico’ mientras cu tin otro opcion -prometedor y ‘limpi’ ta masha dudoso. Pa sigui mantene cueste loke cueste un industria cu ya caba a drenta su fase di retiro, ta prueba di un falta di realismo di gran parti di politica na Aruba. Mescos cu e era di piedra no a termina pa motibo di un falta di piedra, mester despedi di manera resuelto di un actividad industrial cu por cierto a trece hopi prosperidad, pero alabes a afecta seriamente medio ambiente y e bienestar di biyones di hende ademas di varios generacion den futuro.
Caso terminante
Y pa refineria mes e perspectivanan comercial no ta mucho di gaba. No ta por nada cu basta empresa di crudo a para nan actividadnan mientras cu e uzo di energia for di crudo lo sigui baha den e añanan venidero. Mayoria di e productornan grandi di auto ya caba a anuncia cu pa mas tarda na 2030 nan lo produci exclusivamente auto electrico, mientras cu barco lo transforma pa uzo di gas. Alabes e transformacion pa energia alternativa ta sigui acelera, entre otro cu iniciativa nobo riba tereno di energia nuclear. Bou di e circunstanciaran aki no ta logico cu lo inverti US$ 3,5 biyon den un proyecto ultramoderno pa un fuente di energia anticua riba un isla chikito cu ta rondona pa isla/pais cu nan propio refineria, locual ta reduci e posibilidadnan di un propio mercado na practicamente cero.
Alternativa
Ta bon mes cu Quanten no ta e unico empresa interesa pa e compleho industrial enorme. Asina ta conoci -dentro di un grupito chikito- cu tin un combinacion di empresa di alta calidad y financieramente potente cu pa medio di innovacion tecnologico avansa no solamente por libera San Nicolas di e bulto frustia, pero tambe lo aporta na crea empleo, un aumento considerable di nos producto nacional, alabes por sanea e dump di Parkietenbos y entrega e energia cu e ta produci na WEB. Cu tur e bentahanan aki ta parce cu RdA/Gobierno a enfoca exclusivamente riba e inversion di mas halto, cu posiblemente por duna e bentaha mas grandi na esunnan hopi envolvi den forma di finders fee. Por ta cu nan no a realisa nan mes tampoco cu tradicionalmente hopi corupcion ta tuma luga den e sector di crudo. Di otro banda, posiblemente esey ta e motibo cu di parti di gobierno tawatin iniciativa anteriormente pa entrega e refineria na personahe dudoso.
Un biaha mas…
No ta por nada cu SDBA a boga dos biaha caba pa envolvi exponente di San Nicolas (cu al fin y al cabo ta experencia tur consecuencia di cualke escogencia), gremio comercial y sindical den e escogencia final. Solamente asina por haya e sosten amplio necesario mientras cu, como excepcion, henter Aruba lo probecha di esaki! Ta di spera cu den e caso aki tambe lo por canta gloria na di tres biaha.
