Investigacion di nos antepasado indigena ta un parti importante di e trabounan di Museo Arqueologico Nacional Aruba (MANA). Resultadonan di ultimo añanan a demostra cu ta corecto pa haci un cambio di e manera cu ta indica e periodo di e prome habitantenan di Aruba. Di awo ta usa e Periodo Arcaico y no e Periodo Preceramico! Pesey MANA a dedica un paar di borchi/panel nobo den e sala di exposicion permanente pa duna e bishitante un splicacion cortico di e motibonan pa e cambio.
Manera custumber Dia di Betico, MANA su portanan ta habri pa publico entre 10’or di mainta te 2’or di merdia. E dia nacional aki, arkeologonan Raymundo Dijkhoff y Harold Kelly lo ta presente pa duna mas informacion y contesta pregunta. Por bishita e exposicion permanente y e exposicion temporario“Lasonan Caribense, hende conecta, antes y awo”.
Mas cu claro tur bishitante mester drenta cu tapaboca, registra y usa handsanitizer. Mester mantene distancia social y sigui instruccion di personal di MANA. Pa evita aglomeracion y mantene e fluho di bishitantenan ordena e cantidad di bishitante cu por drenta den cada espacio ta keda minimalisa segun reglamentonan di DVG.
Museo Arqueologico Nacional Aruba ta desea comunidad di Aruba un feliz y sano Dia di Betico 2021.
