“Danki na Dios y boluntad di hopi hende nos ta logra bolbe Argentina”, asina Ricardo Ospitaletche a bisa 24ora.com prome cu el a subi avion ayera na Aruba pa regresa su pais. E tabata hunto cu 53 otro Argentinonan pega na Aruba, Boneiro y Corsou cu a biaha hunto ayera for di Aruba, pa Panama y Argentina. Esunnan na Corsou y Boneiro a bula bin Aruba pa sali hunto riba e vuelo di Copa Airlines. E vuelo a sali di Caracas cu Argentinonan pega ey, busca di islanan ABC aki na Aruba pa sigui pa Panama busca esunnan pega ey pa hiba tur bek pa Argentina. Mayoria tabatin nan pasashi warda.
Despues di casi dos luna un grupo di ciudadano di Argentina finalmente a logra bandona Aruba ayera den oranan di mainta. Riba un vuelo special a busca e personanan cu a keda pega aki y a hiba nan Panama for di unda lo coy nan vuelo di conexion pa nan pais.
Ricardo Ospitaletche a splica cu en realidad e grupo a bini pa keda 16 dia riba e isla y finalmente a keda 60 dia. Algo cu sigur nan no a spera ora cu e grupo a sali di Argentina. Nan ta masha agradecido na e pueblo di Aruba. Hopi hende aki na Aruba a yuda nan, no solamente pa loke ta hospedahe sino hasta a presta auto pa nan keiro rond. “Ami sigur lo bolbe Aruba. Mi a bishita e isla nuebe biaha caba.”
E ta conta cu semper el a sinti su mes bon comodo ora cu e tabata di bishita riba e isla. “E ta e luga mas bunita di mundo,” Ospitaletche a bisa. El a apela pa tur hende cuida nan mes hopi y tin pasenshi pa respeta e reglanan manera mester ta.
Claudia Ponson, tabata un di e personanan localmente cu a wordo aserca. El a pensa si su famia pasa den algo asina, e lo tabata kier pa nan haya ayudo. Asina el a cuminsa haci e tramitenan y a logra haya acomodacion pa henter e grupo. El a tuma contacto cu Embahada di Argentina na Venezuela, Consul na Panama y finalmente a haci un video y a pone na Argentina, unda tur hende a cuminsa comparti e video y asina a logra haya mas ayudo pa e grupo logra yega nan pais. Hasta Oficina di Turismo di Corsou y Boneiro a yuda pa en total 54 Argentino a logra yega nan pais.
