Arepenti y pordona ta trece paz y salud mental

Hopi biaha nos ta busca un contesta hopi leu, caba e solucion ta den nos boca, e ta riba nos curason. Nos ta busca e contesta den medicina y e solucion ta den nos relacion cu Dios y un cu otro.

Prome cu nos sali for di cas ta busca yudansa, ora nos nota cu depresion pone un miembro di famia  cuminsa bebe hopi alcohol, huma hopi  sigaria, uza droga , cera curpa den cas, marca su curpa cu tatuah, rasca y corta su mes cu obheto skerpi, corta cabey, drumi sin kier lanta, intento di suicidio etc.  Hunto cu tur yudansa adkeri di dokter, psicologo, psychiater y terapia. Laga nos para keto un rato y tira un bista den nos comunicacion un cu otro, con e relacion di famia ta den cas, pasobra hopi caso di depresion ta bini di herida verbaly fisico cu no ta cura.

Pasobra e herida no ta haya chens di cera, pasobra cada rato tin confrontacion.

Ta comprendibel ora un persona perde su trabou y e tin hopi compromise. Por ehempel cas pa paga, auto pa paga, yuinan tur ta bayendo scol, mester pone cuminda riba mesa. Esey ta trece preocupacion grandi riba e persona su mente.

Pero den Filpensenan capitulo 4 vers 6+7 ta skirbi: No preocupa pa nada, ma den tur cos pa medio di oracion y suplica cu gradicimento, laga boso peticion ta conoci dilanti di Dios. Y e paz di Dios cu ta surpasa tur comprondemento, lo warda boso curason y boso mente den Cristo Hesus.

Esaki ta nifica cu henter famia tin di reuni y haci oracion ora un miembro di famia ta ataca pa depresion. Y asina e persona ey por sali mas lihe cu ta posibel for di e situacion, pasobra e oracion ta mustra cu nos ta uni y nos ta stima otro y e ta lanta fe y forsa den e persona cu ta pasa den e situacion (Colosenses capitulo 3 vers 13+14).

Pero tambe si e persona humilia su mes dilanti di Dios y e reconoce tur su fayonan y arepenti y pordona cualkier hende cu e por tin algo contra dje, Dios ta mira su situacion y kita su depression (Hebreonan 8 vers 12).

Esaki no ta e tempo cu den un cas falta ta bay ta tira riba otro, por ehempel, Papai nunca no a spaar of Mamai ta gamble tur placa. No, esey no ta e solucion. E solucion ta sinta den arepenti y pordona otro, pa asina e paz di Dios por drenta. Pasobra caminda Dios ta tur cos ta bira posibel pa esunnan cu ta kere . 

Hopi biaha hende ta bebe hopi remedi pa e situacion den cual nan ta of tuma hopi tipo di terapia, mientras cu Dios ta sinta warda riba nos bisando bin cerca MI tur cu ta cansa y carga y lo mi duna boso descanso (Mateo 11:28).

Awo a yega e momento pa aplica e palabra di Dios den tur famia. No ta tempo di wak atras, nos tur ta pasando den tempo trabahoso, segun 2 Timoteo capitulo 3 vers 1-9.

Laga nos humilia nos mes y busca cara di Dios.

Sinceramente,

Pastor Marcel Balootje.