ARCADIS: Separacion y exportacion di sushi procesa ta e solucion pa Aruba

Na Aruba pa basta aña caba ta na discusion kico mester haci cu sushi (desperdicio). Di un banda tin esnan cu ta papia di recicla y dera locual ta resta, of hasta exporta e producto recicla y locual ta resta. Di un otro grupo ta papia di uza un “incinerator”, o sea kima tur sushi. Un rapport traha door di e compania interenacional Arcadis titula “Verwerking van Afval op Aruba” (Milieukundige vergelijking van afvalverwerkingsmethoden) ta haci un comparacion hopi cla entre e dos metodonan. E conclusion ta cu e miho sistema ta reciclahe y exportacion, pa yuda protega nos medio ambiente pa e siguiente generacionnan sin un carga adicional pa pueblo.

Durante un periodo largo, e expertonan di Arcadis a studia e situacion na Aruba. Den e situacion actual Aruba ta recicla 68.000 ton di desperdicio (Municipal Solid Waste MSW).

Den e sistema di reciclahe, ta separa e diferente tipo di materialnan di e monton di desperdicio (papel/carton, metal, aluminium, sushi chikito (resto) y RDF (Refuse-Derived Fuel). RDF ta e combustibel produci for di diferente tipo di desperdicio manera sushi di MSW, residencial y comercial.

Den e ambiente aki e expertonan a haci un evaluacion di e actual metodo den comparacion cu e opcion pa kima tur sushi no-sortia. Den e sistema di traha di awo, ta hinca RDF den bales y ta dera nan na Ser’i Tijshi. Tin metodonan adicional cu por uza e RDF, por ehempel como combustibel of como material di construccion.

Den e estudio haci door di ARCADIS ta nota cu e sistema actual di separacion di desperdicio y e forma di traha di reciclahe, ta loke nan ta considera “state-of-the-art”, segun normanan Europeo. Por lesa tambe den e rapport cu si e maneho di Aruba ta pa yega na un economia circular, esta reciclahe, e ora esey mester ta e punto di salida. Mas ainda pa motibo cu re-uzo y spaarmento di materia prima ta un parti escencial di durabilidad (maneho sostenibel). Kimamento di sushi (incineracion), den comparacion cu reciclahe, tin un impacto social negativo pa medio ambiente. Di otro banda, reciclahe ta produci cupo di trabou, contrario na kimamento di sushi.

E instalacionnan di Waste to Energy (WTE) ta trece cun’e inversionnan financiero grandi como tambe gastonan operacional halto. Ta cobra un “tipping fee”, esta loke ta paga extra pa haci uzo di e instalacionnan, cu lo ta mucho mas halto y cu un peso financiero halto pa comunidad. Cu e sistema aki mester tene cuenta cu emisionnan y control di e emisionnan cu ta bay den e aire, como tambe creacion di un dump pa e sas (resto di e sushinan kima) cu ta keda atras. Mester ta cla cu ora ta kima sushi, un porcentahe grandi ta bay den aire como sas y huma y otro parti ta keda abou, cu toch mester un dump pa der’e.

Rapportage recycling van afval op Aruba

Pa cada metodo tin un carbon footprint calcula, esey ta defini como e efecto ambiental negativo. Por ehempel e carbon footprint pa incineracion ta esun di mas halto, 115.000 ton CO2 pa cada 100 mil ton di desperdicio y e carbon footprint haciendo uzo di RDF como combustibel secundario den un forno di cement (den exterior) ta esun di mas abou, 5.600 ton CO2 pa cada 100 mil ton di desperdicio.

Pues cualkier forma di separacion, reciclahe y procesamento di sushi den forma di “bales” tin un carbon footprint mas bentahoso cu esun di kima desperdicio di cas den instalacionnan di incinerator. Haciendo un evaluacion di tur e datonan compila door di ARCADIS, nan ta conclui cu e uzo di RDF como combustibel ta esun cu ta “score” miho pa loke ta carbon footprint, pero tambe ta considera esun aki miho den calidad, positivo y neutral pa medio ambiente. Incineracion di sushi a score riba diferente aspecto negativo, tambe aspecto financiero pasobra e gastonan lo ta hopi mas halto pa paga e inversion bek di 500 miyon florin den 20 aña di tempo.

E expertonan a base di esaki ta conclui cu den e comparacion di dato haci na Aruba, reciclahe di desperdicio y uzo despues di e RDF cu keda liber, ta un miho metodo cu incineracion.

Tocante Arcadis

Arcadis NV, un compania mundial di diseño, ingeneria y “management consulting” ta funda na aña 1888 y tin su oficina principal na Zuidas, na Amsterdam, Hulanda. E ta miembro di e Next 150 index. E compania a cuminsa como Nederlandsche Heidemaatschappij y na aña 1997 a cambia pa Arcadis. Awendia nan tin riba 350 oficina den 40 pais rond mundo.