Apollo: Gonzalez ta liber pero ta continua sospechoso

Diamars atardi Ministerio Publico a emiti un comunicado di prensa den cual ta laga bira di conocemento publico cu a suspende e detencion di e prome sospechoso den Caso Apollo. E caso aki ta relaciona cu e asesinato di e figura publico Poentje Castro y e detencion ta di e individuo di inicial K.J.G.M. kende 24ora tin indicacion cu ta trata di Kenny Gonzalez. 

E motibo pa cual a laga e sospechoso den libertad, segun Ministerio Publico, ta cu e entidad ta considera cu e detencion no ta necesario. Asina mes, a comunicado ta haci bon cla cu persona ta continua di ta un sospechoso den e caso.

Dia 20 di april ultimo Ministerio Publico a anuncia cu nan a habri e caso di Poentje Castro di nobo. Un team di Cuerpo Policial di Aruba, riba peticion di Ministerio Publico, a haci un revision (review) di e investigacion aki cu ta carga e nomber di “Apollo”. Dia 6 di september ultimo a realisa e prome detencion, esta un esun di K.J.G.M., mientras cu dos dia despues, a realisa un di dos detencion, kende su identidad no a keda revela ainda.

MORTO DI POENTJE

John Anthony Castro ta naci dia 20 di october 1963 y tabata produci y presenta e programa “Un dia den bida” cu tabata pasa na Tele Aruba. Bisiñanan a conta cu entre 10or y 11or di anochi di diaranson dia 22 di december 2010, nan a scucha zonido di tiro, cu a zona manera klapchi. A tende zonido di un motorcycle pasando duro den bario.

Diahuebs mainta trempan, dia 23 di december 2010, a bin topa cu Poentje Castro benta na suela den su cura di cas, den un plas di sanger. A hay’e lomba sunu, bisti cu jeans y cu slof na pia. Investigacion a indica cu el a haya un tiro di cerca, den su frenta. Poentje tabatin 47 aña dia cu a mat’e. Despues di e dia ey, a scucha di varios nomber cu lo por ta sospechoso den e caso di asesinato aki. E ta un caso cu a genera hopi conmocion na Aruba y Antias.