Djamars 8 sèptèmber 2020 despues di e seremonia solèm ku a habri e aña Parlamentario 2020-2021, Minister di Finansa, sr. Kenneth Gijsbertha, a hasi entrega di e konsepto di lei di Presupuesto di Pais Kòrsou na Presidente di Parlamento, sra. Ana Maria Pauletta.
Presupuesto di Pais Kòrsou ta un di e leinan di mas importante ku ta keda trata den Parlamento di Kòrsou i ku mester wòrdu entregá tur aña na inisio di e aña Parlamentario nobo. Ta e intenshon pa terminá tratamentu di e presupuesto promé ku fin di aña 2020 dor di debatí i hasi pregunta na Gobièrnu enkuanto entradanan i gastunan presupuestá pa e aña 2021 durante reunionnan di Komishon Sentral i reunionnan Públiko di Parlamento.
