Apertura aña academico na Universidad di Aruba

Rib’e di dos diabierna di september, nos ta celebra tradicionalmente apertura di e Aña Academico nobo y nos ta conmemora comienso di  Universidad di Aruba (UA) na september 1988, 33 aña pasa. E dia aki ta un di e festividadnan mas importante di e aña academico na tur universidad rond mundo, un momento pa reconoce e logronan di e aña cu a pasa y prepara caminda pa e siguiente aña.

Covid19 a cambia nos bida academico profundamente. Aña pasa e comunidad academico a demostra cu nos ta cla pa e retonan di siglo 21 y cu nos por maneha desorganisacion grandi. Na un forma profesional nos a cambia di un dia pa otro di encuentro cara a cara den klas pa duna les online cu un curiculo mixto di les. Nos infrastructura di IT tabata prepara caba pa e cambio aki, e staff di UA tabata traha dia aden dia afo pa sostene e profesornan. Studiante y staff a coopera fuertemente, y hopi a obtene den un par di dia e habilidadnan didacticodi IT pa e reto nobo aki. UA a sigui inverti den infrastructura adicional pa engrandece e capabilidadnan pa maneha e retonan cu e pandemia ta sigui duna, y nos lo mester sigui traha na un ambiente academico sigur pa nos studiantenan y staff. 

Door di nos programanan academico y profesional, nos ta ofrece un brug entre school y Universidad. E ‘Academic Foundation Year’ y e estudionan pa propedeuse di FEF, por ehempel, ta ofrece acceso na un variedad amplio di posibilidad di estudio na Aruba y den exterior. Danki na nos programa internacional di intercambio, Erasmus+, nos studiantenan Arubiano ta wordo curasha pa siña conoce otro pais y cultura y pa tuma e reto pa sali afo pa siña conoce otro forma di studia y di biba.  Asina nos ta yuda nos studiantenan bira ciudadano global. Den nos ambiente multilingual nos studiantenan ta haya e oportunidad di drecha nan habilidad den tres idioma, Ingles, Hulandes y Papiamento. Durante e aña academico aki nos lo enfoca masriba hisa e habilidad den e tres idiomanan aki pa yuda e studiantenan ta mas exitoso. Pronto un centro nobo di idioma lo sostene desaroyo di un maneho di idioma universitario cu lo yuda curasha studiante pa presta miho den hasta mas di dos idioma. 

A pesar di tur contratempo cu Covid a trece cu ne, toch un cantidad substancial di studiante di Bachelor y Master a logra gradua. Un grupo grandi di studiante AFY a obtene nan certificado y por a sigui dilanti pa busca diferente diploma di bachelor. UA ta reconoci internacionalmente como un partner confiabel y esaki a keda demostra atrobe dos siman pasa ora nos a yama bon bini na nos studiantenan nobo di 8 pais. Por haya tur e logronan di UA, y tambe nos relato financiero audita den nos relato universitario anual riba nos website y nos ta curasha tur hende pa lesa esaki. Durante e aña academico binidero, nos ta desea di enfoca riba actividad di investigacion dentro di Universidad y haci e investigacion cu nos ta realisa den tur facultad y programa cu ta crusa otro, mas visibel pa comunidad, tanto aki como den exterior. Nos lo amplia nos red, duna mas sosten na nos studiantenan di PHD, curasha skirbimento academico y traha caminda pa programa di master nobo y tambe pa curso nobo ofreci na nos ‘Center for

Lifelong Learning’. 

Segun nos ta bay creciendo y desaroya posibilidad nobo, ta importante tambe pa nos tin suficiente staff cualifica pa sostene e procesonan aki. Como tal nos ta ansioso pa celebra durante e siguiente aña academico defensa di PHD di por lo menos tres miembro di nos sociedad academico. Educacion superior na Aruba ta un ingrediente crucial pa desaroyo avansa di e pais y su hendenan, Universidad di Aruba ta orguyoso di carga e responsabilidad aki y ta spera di sigui engrandece e rol cu e por hunga den e comunidad di Aruba.