Apenas drentando e prome dia di cuaresma, awe mainta e conocido musica Antoni Gario di Le Groove y di e grupo di carnaval “Pink for Life” a anuncia interes pa e postula su mes pa bira e Presidente nobo di Stichting Maneho Aruba su Carnaval (SMAC). Mesora a sigui un cantidad di reaccion di sosten pa e candidato cu a sigura di lo uni e pueblo carnavalesco pero lo garantisa tambe cu ta tene mas cuenta cu San Nicolas.
Net despues di carnaval, Shannon Henriquez a anuncia su retiro for di e funcion di Presidente di SMAC. Mesora nombernan nobo a cuminsa circula di carnavalistanan interesa pa tuma e rienda di e fundacion cu ta organisa carnaval na Aruba den nan mannan. Darren van Ommeren di Empire Carnival Group ta un di e nombernan cu mesora a resona, mientras otronan a pidi pa Lientjie Merryweather tuma e fundacion over.
Antoni Gario tin hopi aña preparando y produciendo cancionnan pa e temporada di carnaval. Mas o menos 10 aña pasa el a lanta su mesun grupo, Pleasers and Teasers, cu despues a cambia nomber y bira “Pink for Life”. Den Fakkeloptocht e aña aki e tabatin e grupo mas grandi, cu mas o menos 2 mil participante y den paradanan grandi a bay cu 550 participante.
Awe el a anuncia caba cu su prome tarea y deber lo ta pa saca politica di carnaval. Di dos, huradonan di Trinidad y Brazil lo reenforsa e cuerpo di huradonan local pa Caiso y e piesanan di Carnaval. Premionan lo subi y tur detaye di transaccionnan publico lo ta online den realtime! Dus manera entre otro cuanto persona a paga pa e actividadnan publico. Gastonan lo wordo publica regularmente y procesonan di “Bidding” tambe lo ta mas transparente.
Mas ainda Gario ta priminti cu si e bira Presidente di SMAC:
- “Jubu” lo bin bek
- Caiso lo ta separa den tent dus un luga mas chikito y concentra
- San Nicolas Legend’s parade lo bira un realidad pa tur e grandinan cu a aporta musicalmente na Carnaval di Aruba.
- Porta lo ta habri pa Corsou y Boneiro participa den Tumba, mescos cu porta lo ta habri pa e region Caribense competi aki pa Caiso y Soca monarch.
- Lo Pre screen tur cancion cu competi.
- Lo organisa un Carnival beach event na Playa manera e Burn out Monday cu lo bira oficial.
- Jouvé ta bay bek 4’or y e lo bay Macro bin abou
- Lo uza Carnival Village pa tur evento central di carnaval.
- Lo organisa parada di cabay atrobe.
- Jump up di bario.
- Lo subsidia un grupo di tur mucha di Imeldahof, Casa Cuna y tur mucha special.
- Lo organisa 1 of 2 anochi internacional.
- Lo habri e Village tur dia durante Carnaval.
- Tur grupo mester participa cu e mesun kostuum den ambos parada, tanto na Playa como na San Nicolas
- Kimamento di Rey Momo lo ta Diamars cu su parada.
Te ainda no tin un fecha pa e eleccion tuma luga, tampoco ta defini kico ta e rekisitonan pa postula y tampoco ken por vota den un eleccion asina. SMAC a lanta como iniciativa di e gruponan di carnaval, pues probablemente e mesun gruponan mester sostene Antoni Gario pa e por yega na top di e fundacion cu ta organisa carnaval na Aruba.
