No ta mucho dia pasa cu antisocialnan a horta dos airco basta costoso for di Maria School. Despues a sigui e koffiekamer, caminda cu nan a forsa un porta y a uza brandblusser distribiendo esaki, causando daño grandi.
Awo un biaha mas, antisocialnan a bolbe drenta koffiekamer causando destruccion. Fuera di esey a drenta den un di e klasnan.
Cabesante juffrouw Marugg, a conta cu compania di siguridad ta yam’e marduga y avis’e cu alarma na porta di koffiekamer a bolbe bay on y tambe den un di e klasnan, esta 6B y cu ta purbando di comete vandalismo na e scol.
Constantemente tin intento di bay cu e airconan y awo cada rato ta purbando den e koffiekamer.
Por mira cu e tendencia ta sigui. Si a haya hopi reaccion di mayor y maestronan cu ta sigui yuda patruya. Ta haya bon cooperacion di polis di Santa Cruz tambe. Manera cu alarma bay on tur hende tey eynan y hasta sin cu alarma bay on ta patruya rond di scol pa purba di tin’e mas safe posibel y cuida e tiki cu nan tin.
E cabesante a splica cu un tiki mas di cuater aña pasa, e scol no tabata tin problema manera esaki. Cu confiansa e muchanan ta bin scol y e docentenan ta traha sin miedo cu nan ta comete intento di kiebro.
Pero desde dia 21 di november constantemente ta bezig, cada rato cu alarma ta bay on. Ta mira autonan sospechoso y asina por sigui menciona.
Airco nobo
Desde algun luna pasa e scol a haya airco nobo y ta sospecha cu esey ta yama atencion di e ladronnan. Un airco ta costa 3895 florin y nan a bay cu dos. Por bisa cu e ta casi 8 mil florin.
Fuera di esey nan a kibra un porta di koffiekamer cu scharnier y tur, cu ta costa entre 2500 y 3 mil florin. Tambe tin cu reemplasa tur cos cu ta den koffiekamer cu ta microwave, radio, percolator, koppie, glas. Fuera di perdida material, tin hopi perdida emocional y di siguridad tambe, pasobra awo no ta sinti safe mas.
E klas 4B for di dia 21 di november no tin airco den dje. E muchanan ta hayando les cu bentana y porta habri. Loke ta haciendo awor aki di nan propio forsa, dia 13 di december ta purba di haci un bazaar pa cuminsa build up un tiki pa asina yega na e airconan bek. Ta bogando pa siguridad tambe. Ta bezig ta envolviendo tur hende. Tanto bal bo yega na bo cosnan bek y antisocialnan sigui cu nan mal maña. E cos aki mester stop, e ta birando dimas, segun e cabesante.
E cabesante a finalisa bisando mandando un mensahe na e malhechor of malhechornan. Pensabo bon prome ki daño bo ta haciendo, no solamente na e nomber Maria School, pero nomber di Maria School ta encera 267 mucha y tambe 21 docente. Esey ta nifica bo ta bezig no solamente ta bay cu e tiki materialnan cu nan tin, strobando pa nan haya les optimal, pero ta trigger e safety. No tin siguridad mas. Scol mester keda un luga safe pa e muchanan y tambe pa e docentenan.
E otro cos ta cu no kier sembra miedo ni trauma cerca e muchanan. Muchanan ta suppose di yega scol mescos cu nan docentenan. Yega scol contento, cu smaak pa haya y duna les.
No por ta asina cu tur mainta ta lanta cu un preocupacion kico ta bay topa. Por fabor, tene man na boso curason. A traha hopi duro pa yega na e airconan.
Manera tur hende sa airco no ta un luho mas. Nan ta banda di Ser’i Noka y ta hopi calor y hopi stof. Pakico awor aki cu a yega te asina leu pa e muchanan disfruta di un enseñansa den un ambiente tiki mas agradabel cu e cosnan aki ta tumando luga.
Tin ora ta bisa cu a traha asina duro pa yega na un airco y por ta nan ta hort’e y pa bend’e pa co’i loco. Ban ta un tiki mas consciente di e actonan cu nos ta haci y ki consecuencia por tin pa nos futuro.
