Diamars mainta docentenan no por a wanta nan lagrimanan ora cu nan a drenta Maria School. Un tristesa grandi a invadi nan na momento a mira loke cu antisocialnan un biaha mas a comete na e scol situa na Sta Cruz.

Yahaira Marugg, cabesante di Maria School, a duna un relato di loke ta pasando na e scol. Dia 21 di november, nan a haya bishita di antisocialnan cu a drenta den klas 4B y a bay cu dos airco marca Mitsubishi completo. Despues di esaki, a huur  un security pa fin di siman, pa asina por ekipa e klasnan cu alarma. Y esaki, segun 24ora.com por a compronde, a wordo haci riba nan propio esfuerso.

Antisocialnan a bolbe a comete vandalismo y destruccion na Maria School

Antisocialnan a bolbe a comete vandalismo y destruccion na Maria School. Click link pa mas https://24ora.tv/34LhGFX

Posted by 24ora on Tuesday, December 3, 2019

Constantemente, desde e diabierna siguiente mes, e alarmanan ta bay on. Ta supone cu tin hende cu ainda ta bezig, tratando di drenta e edificio. E fin di siman cu a pasa, tabata uno druk, caminda cu alarmanan tabata bay on den forma continuo . E docentenan di Maria School, hunto cu patruyanan di polis di Santa Cruz, tabata bin cada rato pa controla un ke otro.

Sinembargo pa diamars marduga, pa 2’or y 20, alarma di e koffiekamer a bay on, caminda a bin constata cu antisocialnan a forsa e porta, drenta paden. Nan a coy e brandblusser spuit full den e koffiekamer y a comete destruccion.

Como cabesante di Maria school y mirando cu scol ta un caminda unda cu nos muchanan ta bin siña, caminda cu nan mester tin un luga safe, ta pidi mayornan, comunidad henter, Santa Cruz, pa yuda e scol pa cuida e scol, cuida e tiki materialnan cu nan tin y mas cu claro yuda pa e scolnan ta safe pa nos muchanan.

Vakantie ta den porta

Marugg a splica cu di parti di scol nan ta haciendo tur posibel pa yega na material di sistema di siguridad pa yuda preveni cu ladron of antisocialnan ta drenta scol. Yuda cu alarma, camara, etc. Pero segun e cabesante nan so no por logra esaki. Ta p’esey ta haci un apelacion na tur mayor, Cuerpo Policial, pa sigui yuda e scol y tambe na comunidad di Santa Cruz, pa yuda sigui controla. Manera cu tur hende sa, vakantie ta den porta cu ta haci cu e scol ta bira mas vulnerabel. Practicamente e scol no tabata tin descanso. A traha un schedule, y constantemente docentenan, for di mainta ta dal rond, controla tur cos. Ta un peso hopi grandi pa nan mes, ademas di les cu nan ta duna. Pero nan ta consciente cu nan tin e balor di loke nan tin. E tiki cu nan tin pa e muchanan y kier cuida nan pa e muchanan por tin tur cos necesario cu nan mester pa haya nan lesnan.

Airconan

Pa awor aki, como docentenan, a cera cabes pa cuminsa na haci un Christmas Bazaar di 13 di december, pa cuminsa recauda fondo pa por yega na e airconan aki. Ta airconan marca Mitsubishi, balora na 3895 y ladronnan a bay cu dos caba. Nan ta practicamente den 8 mil florin caba cu nan mester bay wak unda nan ta saca esey. Y awo e porta di koffiekamer a wordo forsa. Esaki ta un otro costo acerca. Tambe tin cu paga un compania pa haci limpiesa den e koffiekamer, pasobra tin e stof di e brandblusser den dje cu ta malo pa salud.

Apelacion

Juffrouw Marugg, como cabesante, como team Maria School, ta pidi un biaha mas na mayornan, comunidad di Santa Cruz, pa yuda tira un bista, proteha e scol, e materialnan. Si bo tende di cualkier cos, un movecion straño, laga sa. Duna tips na warda di polis. Tambe por yama scol cu ta 5858344, pa asina ey por tin un Maria School mas safe pa nos muchanan.

Comments

comments