Ta tristo pa mira con hendenan sin escrupulo ta bay horta hustamente den scolnan, unda cu nan mesun yiu of un familiar ta atendiendo. Diahuebs mainta docentenan cu a yega Maria School a topa cu un bista tristo pa nan, ya cu nan a bira victima di ladronnan.
Nan a constata cu anti socialnan a drenta horta den klas 4B. Nan a bay cu tur dos split unit marca Mitsubishi. Segun por a compronde for di e scol, nan ta sospecha cu e ladronnan a drenta via Ser’i Noca, corta waya di coriente, desarma e airconan banda patras y a kibra un bentana pa asina drenta parti paden pa despues horta e airco completo.
E cuerpo di docente ta haci un apelacion na cualkier persona cu por a mira algo, cu mester a sosode den oranan di laat di diaranson anochi pa diahuebs marduga, pa tuma contacto cu un di e docentenan of cu Polis. Tambe si bo wordo aserca pa cumpra un unidad di airco di marca Mitsubishi, bati alarma cerca autoridadnan. “Nos ta pidi tur mayor y comunidad henter pa yuda tira un bisti y yuda nos cuida nos airconan. Di antemano masha danki den nomber di Maria School.”
