Diadomingo pasa di 3:00 am tanto polis y brandweer a bay cu urgencia direccion e pier di Cura Cabay caminda cu tabatin dos boto na candela. For di leu por a wak huma bay halto. Nan a mobilisa mesora y asina cu cuerpo di bombero a yega na sitio nan a bay den accion haciendo nan maximo esfuerso pa paga controla y paga e candela p’asina esaki no alcansa e otro botonan den cercania.
Por a tuma nota cu e heki tabata un poco habri, pues por sospecha cu un anti-social cu mal intencion a forsa esaki pa asina cende e botonan na candela. Mientras cu cuerpo di bombero tabata haci nan maximo esfuerso, algun persona cu ta atende cu boto a presenta na sitio pa wak si ta nan boto tabata na candela. Dado momento tambe por a tuma nota con e candela tabata yega na e parti di motor di e boto, pues por bisa cu practicamente no lo resta nada pa e boto aki por funciona.
Despues di algun minuut por a wak con cuerpo di bombero a logra paga e candelanan. E procedura normal ta encera cu lo bay investiga ta ken a comete e delito aki. E tipo di actonan aki sigur ta di lamenta ya cu probablemente ta dos piscado a keda sin nan boto pa sali bay pisca.
