Anselmo Pontilius: Gobierno, Citgo y RDA mester sinta na mesa pa kita duda for di e trahadonan

Un tema hopi intesante cu sigur mediador di gobierno, Anselmo Pontilius a papia di dje, ta e trahadonan cu ta traha den refineria, cu ta afilia ainda na un sindicato, sea. IOWA of FTA.

Pontilius a menciona cu tin dos parti. Mester sa cu trahadonan den staff di e refineria, un parti di nan desde januari di e aña aki ta organisa via FTA y tambe tin esnan cu ta miembro di IOWUA tur tempo.

Anselmo Pontilius: Gobierno, Citgo y RDA mester sinta na mesa pa kita duda for di e trahadonan

Anselmo Pontilius: Gobierno, Citgo y RDA mester sinta na mesa pa kita duda for di e trahadonan. Click link pa mas https://24ora.tv/33XtpAU

Posted by 24ora on Friday, November 15, 2019

Di parti di IOWUA, a pidi reunion cu minister di labor pa haya claridad, particularmente despues cu a firma e MoU cu Citgo. Eyden a bin e punto, esta e cantidad di trahadonan cu ta bay over si of no, pa RDA y logico, si ta asina cu no por tuma tur hende kico ta e areglo di pago cu lo paga e trahadonan.

Esey ta un punto cu IOWUA a trece p’adilanti. A pidi reunion cu minister di labor riba e punto aki, pero no tin un claridad total riba e parti aki ainda.

Di parti di FTA, a pidi mediador di gobierno coordina un reunion cu RDA y Gobierno. Di parti di RDA, a bisa cu ta prefera cu e reunion ta coordina, den e caso aki cu Prome Minister, en todo caso e gobernantenan encarga, pa motibo cu no tin un claridad total riba e parti di e trahadonan.

Si RDA ta tuma over e operacion den e caso aki di e planta y/of e planta cu no ta den operacion, pero tambe e almacenahe di petroleo den e tankinan, di acuerdo cu ley, manera e ley ta pasa na 2014, e compania cu ta tuma e operacion, ta tuma tambe e trahadonan.

Esey ta un punto den discusion. Tin di compronde di parti di FTA ora cu e dirigentenan a reuni cu hunta di comisario y conseheronan di gobierno, a bin cu un punto di discusion, caminda cu nan a informa cu RDA por tuma solamente 10 pa 12 trahado, cual ta un contradiccion di loke a señala anteriormente, cu RDA por tuma 40 for di 77 trahadonan cu tin actualmente.

E parti aki mester ta clarifica y ta spera cu prome cu fin di siman por sinta na mesa cu Prome Minister, cu FTA, eventualmente cu IOWUA pa haya un claridad riba e punto aki, sigur pa e trahadonan sa, si tur hende ta bay over si of no y si no ta asina, kico ta e areglo cu tin pa e trahadonan cu lo no sigui traha.

Sindicatonan preocupa

Segun Pontilius FTA a pidi mediador pa coordina un reunion hunto cu gobierno, pa trata di firma un documento cu ta kita dudanan for di mesa. Ta necesario si ta puntra pa firma un documento hopi cla entre e sindicatonan, nan dunado di trabao (Citgo) y nan futuro dunado di trabao (RDA). No por laga e trahadonan keda den un incertidumbre, particularmente na momento cu anuncia cu RDA ta tuma over e operacion. E gobierno a informa na momento cu el a firma e MoU. Pa kita tur duda, lo mester tin un claridad y e claridad aki no por ta basa ariba cu nan di, cu e di. Sino e mester ta un documento formal cu tur partido ta clarifica posicion di e trahadonan, e cantidad di trahadonan cu ta keda traha, nan condicionnan di trabao. Manera e ley ta hinca den otro awor aki, e compania cu tuma over tin un obligacion di tuma e trahadonan over cu tur nan condicionnan di trabao existente.

Si no por, den e caso aki tur tuma hende, mester yega na un acuerdo, ken ta paga, con ta paga, bao di cua condicion nan ta paga esnan cu no por tuma y cua ta e argumentonan cu no por tuma tur e 70 y tanto trahado.

Claridad pa tur hende

Gobierno a bisa cu nan a haya e yabi. Segun Pontilius, no sa si nan no a tene cuenta cu e condicionnan laboral. Pero importante ta pa bay mesa pa clarifica esakinan. Pa e trahadonan ta hopi importante, esey ta loke sindicatonan a señala. Cualkier grupo cu ta tuma over como e dunado di trabao nobo, ta mara na nos leynan local. Den e caso aki, ta bon cu e partidonan mes Citgo, gobierno y RDA clarifica internamente, pa ora cu e partidonan bay mesa, cu e no ta bolbe bira un discusion, sino cu por trankilisa e situacion door di firma un documento cu tin claridad pa tur hende.

Trankilidad laboral

Citgo na e momentonan aki ta e dunado di trabao di e 70 y tanto trahadonan aki. Tanto miembronan di IOWUA como esunnan di FTA. Ta hopi importante cu nan ta na mesa, pero e responsabilidad ta cay sigur pa esnan cu a informa, den e caso aki RDA, cu nan ta tuma over. E punto aki lo mester, pa e rason ey, proposicion di mediador, cu tin tur e partidonan na mesa, en bes cu ta keda papia cu un y papia cu e otronan separa. Ta importante pa tin un claridad y cu tin trankilidad tambe y tur trahado sa e ora kico ta nan situacion laboral, si nan tin trabao awor aki, si of no.

RDA por cubri of no

Ta dificil pa bisa si RDA tin placa of no, pa motibo cu mediador no tabata den e negociacionnan. Pero una bes cu informa publicamente cu bo ta bay tuma e operacionnan, tin cu tene cuenta cu tin un responsabilidad di e trahadonan.

Kico por pasa

Na momento cu informa publicamente cu un otro dunado di trabao ta bin aden, y na momento cu a informa cu den todo caso publicamente cu Citgo lo paga e trahadonan, tene cuenta cu na momento cu paga e trahadonan nan añanan di servicio, a termina nan relacion di trabao legalmente. Pa e rason ey ta hopi importante pa clarifica un biaha mas cuanto trahado ta bay over si of no cu e compania nobo, of cu e dunado di trabao nobo.

Atrobe, den e caso aki, segun FTA, den combersacion anterior cu tabata tin cu director Alvin Koolman kende tabata director di RDA, a informa nan cu nan por tuma 40 of mas trahado. Ta puntonan cu a keda den aire, pasobra no tin un documento cu e partidonan a hinca den otro cu ta garantisa loke mester pasa.

Ta hopi simpel pero hopi cla tambe loke nos leynan ta bisa riba e derecho di trahadonan y esey tin cu ta clarifica, pasobra ningun trahado no por keda den incertidumbre, sabiendo cu ta bay bin cambio.

Speransa

Segun Pontilius, e trahadonan mester sa cu nan ta wordo debidamente protehi pa ley. No ta sin mas un dunado di trabao ta bisa cu e siguiente dia e ta stop di traha pasobra e grupo A y grupo B no a tuma hopi trabao. Aki ta mara na ley. Pa e rason ey tambe, e insistencia ta pa tin tur hende na mesa pa clarifica esaki. E parti importante ta e trahadonan den e refineria, trahando cu almacenahe, mester di un trankilidad. Y pa tin trankilidad mester di un documento cu ta decifra exactamente kico ta pasa cu cada trahado.