ANSA a firma CAO di tres aña cu sindicato STA

E negociacionnan entre ANSA y STA pa un CAO nobo a dura basta largo. Pa 11 luna largo nan tabata bezig na mesa di negociacion, segun Nilki Kock, director di ANSA NV.

En principio no mester conclui door di e periodo largo cu tabata negociacionnan dificil. Tabata negociacionnan cu a conoce contratiempo, pero no cu ariba su mes partidonan tabata leu for di otro y door di esey a dura 11 luna.

Adelanto

Adelanto logicamente tin, segun Kock. Si no tabata tin adelanto e trahadonan lo no a bay di acuerdo cu e CAO aki. A yega na un adelanto substancial, unda cu den un pakete cu a yega na otro, cual den 3 aña ta costa e compania 800 mil florin.

ANSA a firma CAO di tres aña cu sindicato STA

ANSA a firma CAO di tres aña cu sindicato STA. Click link pa mas https://24ora.tv/2GaBmsx

Posted by 24ora on Thursday, July 11, 2019

Pa aña e ta costa e compania 270 mil florin mas of menos, reparti den 45 trahado, pa tin un idea di mas of menos ki sumanan ta papiando. Prome cu a firma e CAO a duna un mensahe di cautela, cual Kock a comparti cu e trahadonan. E no ta kere cu esaki a largo plaso ta sostenibel.

ANSA como un compania cu ta liga directamente cu aviacion, tin un situacion cu Venezuela, ya cu fronteranan ta cera desde 20 di februari ultimo. Esaki a afecta e compania seriamente. “Esaki ta e realidad financiero cu tin cu biba cun’e Mester keda cauteloso y monitor e situacion di cerca.” Hasta a haci un peticion na e sindicato, cu a duna nan compromiso tambe cu si e situacion aki no mehora a corto plaso, cu no ta exclui e posibilidad pa haci un peticion riba nan pa sinta na mesa pa renegocia e CAO aki.

E CAO aki tin un duracion di 3 aña, 2019-2021, pa 45 trahado.

MAS MERCADO

Otro opcion cu no ta Venezuela ta dificil. E problema ta cu Venezuela ta un mercado importante pa Aruba, mirando e cercania cu nan tin cu e isla aki. Ta papiando toch di un dependencia den pasado di rond di 10% di e entradanan cu tabata liga cu Venezuela.

Door di cera e frontera, esaki a cay afo. Di un otro banda, ta confia cu e otro mercadonan tradicional manera Merca, lo recompensa e perdida di entrada di Venezuela mas tanto posibel. Esey ta eigenlijk e speransa cu tin, segun Kock a bisa. Pero te ainda no a cuminsa haya e señalnan. Ainda e frontera ta cera.

Pa loke ta e prome lunanan di high season, esakinan tabata mustra bon. Desde april, mei y juni, cifranan tabata mustra toch un situacion di caida cu ta refleha e 10% di e mercado Venezolano E ta refleha casi 1 riba 1 den e entradanan di ANSA. Gobierno ta na altura di e situacion aki. Pero, Kock ta bisa na mesun momento cu, no ta ANSA so ta sinti esaki, refieriendo AAA, W-Aviation, y e otro companianan representante di aerolineanan Venezolano.

ANSA a cuminsa na september 2017 ta opera cu nan radar. Esey ta e siguiente paso como compania hoben, cual ta mehoracion di e siguridad y tambe di eficiencia den nan espacio aereo. Esey tabata sigur un aporte masha grandi mes na nan forma di traha y tur hende ta hopi contento cun’e, no solamente nan trahadonan, pero logicamente nan clientenan cu ta hopi satisfecho cu e mehoracion cu nan ta sinti di biaha den siguridad y eficiencia di e compania.

ANSA, manera tur hende por corda, tempo cu el a lanta, den ley pa su independisacion, ta pa elimina e retrasonan cu tabata tin den inversionnan. E compania basicamente a lanta pa haci inversion. Tur nan ganashi ta bay pa reserva pa inverti, Kock a splica.

E negociacion

Segun presidente di STA, Diego de Cuba, e negociacion no a bay facil. E tabata tin su dianan complica den dje y tabata tin bastante discusion cu a tuma luga. Esey ta nifica cu e democracia na Aruba ta bibo, caminda cu bo por discuti y caminda cu por dialoga, aunke tin diferencianan di opinion, por sinti cu e democracia ta bibo. E diferencianan no a stroba di yega na e meta cu cual a cuminsa e combersacionnan, di logra un contracto colectivo bon balansa, cu tur ingrediente necesario pa por yam’e un bon contracto colectivo.

E empleadonan di ANSA NV a conoce un adelanto hopi bon, segun de Cuba. Si bay papia bruto, por bisa cu cada un empleado a bay dilanti mensualmente. Si calcula bon, nan a bay dilanti cu casi 500 florin pa luna, cual ta un adelanto cu den e futuro CAOnan, lo no por bay conoce, mirando e hecho cu ta yega na un limite tambe, cu tin cu percura pa mantene e compania bibo y e gastonan di personal. P’esey no ta prudente pa den un proximo contracto colectivo, sigui press pa e bay mas halto.

Un adelanto asina aki, tur empleado lo ta contento cun’e. E CAO aki ta contene tur cos. E tin voorjaarspremie, e tin najaarspremie, e tin vakantieuitkering, e tin bonus, e tin bashipremie, e tin kindertoelage, e tin delaster un ingrediente cu un bon CAO por contene. E tin dianan liber cu pago pa empleadonan cu por solicita p’e. Segun de Cuba, casi e por tribi di bisa, un di e miho CAOnan actual riba e pais aki, cual ta esun di ANSA NV.

STA ta hopi contento cu esey. Di parti di gerencia tambe por bisa cu e negociacion a bay den hopi bon ambiente y di parti di e trahadonan tambe tabata tin varios reunion cu a tuma luga pa por a informa nan den ki direccion nan ta bayendo. Mayoria absoluto di nan tabata di acuerdo cu esaki y ta p’esey a yega na final di e capitulo aki, cual ta e contracto colectivo pa ANSA NV cu tin un duracion di tres aña, cu ta drenta na vigor cu forsa retroactivo, dia 1 di Januari 2019.

“A keda comproba cu ora STA ta sinta na mes pa negosha, nan ta negosha serio y e delegadonan tambe ta negosha serio hunto cu nan. P’esey por mira un resultado hopi positivo, caminda cu e compania por biba cun’e y STA y e trahadonan tambe por biba cun’e.

 

 

Comments

comments