Djaweps 19 di sèptèmber na Villa Maria a tuma lugá un evento eksitoso di rekoudá fondo den kuadro di 15 aña di fundashon Ride for the Roses. Gosando di jazz Franes, biña Franses i pasapalo Franses a bende 16 obra di arte na findishi, entre nan un grabado di Picasso.
E loke e anochi a generá ta bai gasta na aktividatnan di informashon i kuido ku fondo Prinsesa
Wilhelmina (PWF) ta ehekutá, na benefisio di un grupo kresiente di pashènt di kanser na nos isla. Ku un anochi agotá ku 175 wéspet, un ambiente festivo i un resultado neto di 70 mil florin, ku rason por konkluí ku e anochi Franses aki ta un éksito karitativo estupendo! PWF tambe tabata presente i a enfatisá na e wéspetnan e importansia di e trabou di Ride for the Roses.
Saskia Teeuwen, yu muhé di Norma Teeuwen, a konta e públiko kon valioso PWF tabata pa su mama i tambe p’e mes. Un di e 16 obranan di arte ku nan a bende na findishi tabata un kuadro di Atie Schotborgh ku su mama Norma Teeuwen a regalá na PWF. E duo di Marro Pietersz i Egon Sybrandi tabata guia e findishi na un manera profeshonal; nan
a logra hasi e evento un fiesta yen di bida. Sin sosten di un grupo grandi di hende i instansia lo no tabata posibel pa logra e rekoudashon neto. E organisashon ta gradisí di kurason tur voluntario i patrosinadó pa nan respaldo.
