Animal Relief Foundation hunto cu Purina ta organisa caminata diasabra awo

Animal Relief Foundation ta bay tene un caminata diasabra awo, dia 15 di Juni, entre 5’or di atardi y 7’or di anochi. Nan kier purba di cuminsa un tiki na ora, pero ya pa 5’or y 15 kier subi caminda. Esaki ta pa preveni cu ta bira mucho laat, segun veterinario Natalie Booi. El a manda un invitacion pa henter pueblo di Aruba uni cu nan den e caminata.

ADV

 

Meta

Sigur dos biaha pa aña ta purba di scoge dos fundacion cu tin mester di e ayudo. Hopi di loke cu Kathy Andreottola, di Animal Relief Foundation, ta haci, ta boluntario. E no ta wordo paga p’e. Ta hopi tempo y placa ta bay pa esey. E ta haya hopi fondo si di turista. Andreottola ta un Mericano pero tin mas di 30 aña ta biniendo Aruba. Door di esey e tin hopi contacto cu turistanan, kendenan tin tiki problema cu e cachonan riba caya. E tin un network hopi grandi na Merca y ta percura pa hopi cacho wordo rescata.

Animal Relief Foundation hunto cu Purina ta organisa caminata diasabra awo

Animal Relief Foundation hunto cu Purina ta organisa caminata diasabra awo
https://24ora.tv/2IA96Qa

Posted by 24ora on Monday, June 10, 2019

 

Na prome luga nan ta rescata e cachonan, percura pa e bestianan wordo trata. Y ora nan ta full saludabel, e ta manda nan Merca, caminda nan ta haya un "forever home". Tin hopi cacho di Aruba, cu hopi biaha e ta bisa den un forma di joke, ta un tremendo souvenir pa ora e hendenan bay bek. E turistanan ora nan a wak cacho cana na lama of riba caya y nan kier rescat'e, nan ta yama Kathy, kende ta hopi conoci pa esey. Pero nan mester di ayudo. P’esey nan ta organisando e caminata aki. Nan ta spera di haya hopi inscripcion, pa mas tanto hende participa den e caminata. Banda cu e caminata ta bon pa salud, of bo ta pasa momentonan dushi cu famia y amigonan, bo ta yudando tambe pa un bon causa. Pues participando, bo ta yuda e mascotanan cu ta riba caya cu realmente tin mester di e ayudo.

ARF

Kathy Andreottola a conta cu el a cuminsa cu ARF tempo cu el a baha cu pensioen. E ta biniendo Aruba desde 1986 y 15 aña pasa el a retira. E mes ta procedente for di Boston y pa winter e ta bin Aruba pa pasa su tempo. E tey awo casi henter aña. El a cuminsa cu Aruba Animal Shelter tempo cu el a cuminsa bini Aruba. E turistanan sa bis'e cu nan sa ta preocupa cu e animalnan y door di esey el a cuminsa cu su propio organisacion pa asina manda e animalnan Merca. Ya nan ta existiendo pa 10 aña como un organisacion internacional na Merca y dos aña pasa a registra na Aruba.

Andreottola ta sigui conta cu semper tin mester di donacion, un famia pa e cachonan tanto na Aruba como na Merca. Nan sa haya yamada pa yuda un animal, pero e pregunta ta surgi si tin suficiente placa pa por yuda. Si no tin e placa, no por yuda, segun Kathy. No ta tuma animal si no tin placa p'e. Cu un famia di criansa, ta yuda hopi pasobra e ora por yuda cu alohamento di e animal, cual sa ta hopi caro. Ta prefera di percura pa e animal cerca un famia, na luga di ta cera.

Nan sa reuni den grupo y ta haci loke nan por. ARF ta trahando hunto cu e organisacionnan na Aruba, cual ta bayendo hopi bon.

E fondonan

Pa por trata e cachonan, manera menciona, nan mester di placa. Pa aña, Kathy a menciona cu nan ta gasta por lo menos 60 mil florin pa aña y ta p’esey mester di un famia pa e cachonan. Hopi biaha nan no tin. Si ta un caso hopi fastioso, e ora nan mester tuma nan y tin biaha pone nan bek riba caya, cual ta hopi fastioso. Naturalmente tin e costonan di dokter. Tin algun dokter cu ta riba e isla y tambe tin dokter di e organisacion cu ta na Merca.

 

Purina

Purina tambe ta contribui na e evento aki. Ana Maria Ramirez, brand manager di Purina a conta cu nan ta sumamente contento di por contribui na e caminata aki, cual ta un caminata hopi special pa recauda fondo pa Animal Relief Foundation. Un fundacion cu ta haci trabaonan hopi bunita. Tin un problematica hopi grandi di cachonan riba caya cu mester di e atencion necesario, cu mester di cuido medico. ARF ta percura pa busca e cachonan aki, duna nan e cuido medico necesario, percura pa nan tin awa y nutricion. Nan ta haci un trabao hopi importante den nos comunidad.

Ta gradici Animal Care Clinic pa duna Purina e oportunidad. Ta na iniciativa y e ta un bunita oportunidad pa henter e comunidad di Aruba duna nan apoya 100% y e fondonan recauda ta bay pa ARF. Apart di esaki e ta un oportunidad pa contribui na bo mascota. Sea cu bo kier cana of core, bo por forma parti di esaki. Registracion ta solamente 25 florin. 100% ta bay pa Animal Relief Foundation. Ta invita henter pueblo di Aruba pa join diasabra awo, dia 15 di Juni, for di 5'or di atardi na Animal Care Clinic na Paradera. Tur amante di animal, tur esnan cu kier haci un cambio y yuda e fundacion aki, cual ta rescata cachonan riba caya.

Pa inscribi por haci'e na Animal Care Clinic na Paradera, of por inscribi tambe na Birds & Fishes plus Dogs, cual ta e Petshop situa na Dakota.

Comments

comments