Maria College a tene nan eleccion di reina como nan jump in, unda cu e alumnonan a pasa un mainta yen di ambiente, hopi sonrisa, hopi apoyo y bailamento riba e musica di carnaval.
Despues di a scucha y mira tur show, alumnonan di Maria College a haya sa kendenan a bira nan reina y prinsesita 2019. Cada participante a trece padilanti diferente mensahe den nan speech, a haci show treciendo e pasado y presente.
E prinsesita 2019 ta Jean Mary Maduro, 1st runner up Valery Rey, Best Show Jaydee Kock, Best Speech Jaydee Kock, Best Costume Jaydee Kock. E reina di Maria College ta Angelica Hernandez, 1st runner up Alysha Croes, Best show-speech y costume a bay pa Angelica Hernandez.
E eleccion y jump in tabata hopi bunita pa experencia cual lema tabata “I am because we are” ta resona, segun Angeline Rosenstand, directora di Maria College. Sponsornan, docentenan, mayornan y alumnonan a bini hunto pa asina engrandece carnaval. Esey ta algo bunita cu tin pa inculca den e muchanan, pasobra esaki ta un habilidad di siglo 21 cu ta logra hopi. Maria College ta un scol di casi 80 aña y e directora no tabata sigur pa cuanto aña nan ta organisando e eleccion di reina y jump in.
No ta tur aña nan ta tene e eleccion di reina, pasobra aña pasa a opta pa no tene eleccion mirando cu tabatin un reina cu a bay participa den stadion. Segun e directora, e enfoke a bay eynan y awo a prepara pa un eleccion grandi awe. E ambiente tabata super bon, unda cu nan a ricibi un sorpresa di Famia Planea. Famia Planea a bin cu artistanan reconoci bou e muchanan, kendenan a toca pa nan. Tambe tabatin brass band di ex alumnonan di e scol y tabatin e presentacion di e rey di calypso hubenil Justin Valdez.
