Diamars ultimo, tres dama a huramenta como Hues dilanti Su Excelencia Gobernador di Corsou, Lucille George-Wout. Ta trata aki di mr. C.E.M. Nootenboom-Lock, mr. A.J. Martijn y mr. K.A.M. Lasten. Tur tres ta bira miembro di “Gemeenschappelijk Hof van Justitie van Aruba, Curaçao, Sint Maarten en Bonaire, Sint Eustatius en Saba”.
E Arubiana mr. Angeline “Angèle” Martijn di 47 aña di edad, procedente di San Nicolaas, a huramenta como miembro di Corte Comun di Caribe Hulandes. For di aña 2015 el a sigui e estudio pa Hues, conoci como “Rechter in Opleiding” na Corsou. E ultimo parti di e estudio mester a sigui na Rechtbank Den Haag na Hulanda y a caba esaki cu exito na aña 2018.
Mr. Angèle Martijn a traha e ultimo 4 añanan como Hues suplente den Corte di prome instancia na Corsou den casonan civil y penal y na Hof den casonan penal. Awor e lo traha como Hues na Corte di prome instancia na Corsou den casonan civil y di ambtenaar.
Mr. Angèle Martijn a termina su estudio di ley na aña 2003 na Universidad di Aruba y despues a traha 7 aña como Abogado na Aruba. Di 2010 te 2015 e tababa consehero huridico den Gobierno di Aruba.
Prome cu a studia ley, el a studia Facility Management na Groningen, Hulanda. Mr. Martijn ta ex alumno di Colegio Arubano.
