Den cuadro di discubri identidad y proposito di nos hobennan, Desaroyo di Talento Certifica y Docente, Sra. Sharleen Tromp recientemente a hiba su material titula “Caracteristicanan di personalidad cu ta yuda studiante alcansa exito” den forma di un lectura pa Ibero High School, como tambe Colegio San Nicolas.
Un materia diseña pa yuda hobennan compronde y balora nan mes – y esnan rond di nan – nan capacidad y habilidadnan como tambe nan debilidadnan. Un materia, cu ta yuda individuonan compronde y acepta tanto nan mes, como esnan rond di nan.
“Un di e cosnan mas grandi di e materia ta cu e ta aumenta autoestima. E ta trece acceptacion propio, como tambe, pa otro. Mi ta aprecia e material pasobra e ta educa nos studiantenan con pa relaciona cu hende cu ta di diferente caracteristica y actitud. Con nan por siña di no solamente bay bon cu otro, pero tambe di nan diferencianan. Esaki ta un materia cu no solamente ta importante pa e studiantenan pero e ta hopi importante pa e staff pasobra nos ta trata cu studiantenan di diferente origen, actitud y comportacion. Y e materia ta siña nos con pa trata cu nan den un manera mas amical. Enbes di frustracion ta bin realisacion y aprecio. Mi deseo ta pa duna esaki den grupo mas chikito den nos klasnan,” Director Sr. Andy Centeno di Ibero High School a duna di conoce.
“M’a kere cu mi tabata manera e otro studiantenan, pero manera nos a haci e ehercicio riba e banner mi a bin compronde cu nos ta hopi diferente for di otro y mi a identifica mi personalidad. Ami ta desea di studia comercio y locual mi a bin haya sa di mi mes awe, a haci mi masha sigur mes di e direccion aki,” Dwight Thomas Jr. studiante di grado 11 – Ibero High School a bisa.
“E caracteristica cu mi por a reconoce den mi mes ta cu ami ta un persona cu ta haci amigo facilmente, aunke bo no gusta mi, mi por pone bo gusta mi. Mi ta un storyteller y mi gusta encurasha hende. Mi ta contento di por a afirma tur esaki awe, den e materia di awe mainta,” Studiante di Colegio San Nicolas H5, Fritz Remfort a bisa. “Caracteristicanan di personalidad cu ta yuda studiante alcansa exito” a wordo diseña pa guia individuonan discubri nan identidad y proposito predestina pa asina nan por cana den nan debido direccion y desaroya nan capacidad como un lider den nan area di experticio. Dia 25 y 26 benidero lo bay tin un charla tocante e materia aki na Biblioteca Nacional. Na playa dia 25 y San Nicolas dia 26. Esaki ta pa hoben y pa mayornan cu ta desea compronde nan yiunan miho.
