Andre Bosman tin politiconan coriendo “cabes di gay” na Aruba

6069

Ayera mainta 11:00am (ora di Hulanda) a tuma luga un reunion den Parlamento na Den Haag, den cual Parlamentario Andre Bosman a hiba palabra y a los un “bom”. Den su discurso el a menciona cu e ayudo di Hulanda ta mara na condicionnan y cu ta spera miho gobernacion y sin cu e placa ta “perde” entre friends and family. El a repasa e lista di politiconan corupto cu a bay cera na Corsou, St. Maarten y ora a menciona Aruba a referi na Serlimar.

Tur esaki a sosode memey di e reunion cu topico “Financiële ondersteuning Caribische landen in verband met COVID-19 en andere beantwoording van de vragen commissie over effecten corona op Caribische delen van het Koninkrijk”. Otro Parlamentarionan tambe a para duro cu Gobierno mester tin bon control riba e placa, demostrando claramente cu tin un scarsedad di confiansa den gobernantenan di Aruba. Ta teme cu e placa ta bay otro caminda cu locual Hulanda a acorda.

Andre Bosman den un reunion cu Evelyn Wever, prome cu el a bira Minister Presidente.

Andre Bosman ta den e fraccion di mas grandi den Parlamento di Hulanda, esta di e partido Volkspartij voor Vrijheid en Democratie (VVD) cu 32 asiento. E di dos fraccion mas grandi ta Partij voor de Vrijheid di Geert Wilders cu 20 asiento, sigui pa CDA y D66 cu 19 asiento, Groenlinks cu 14 asiento, SP cu 14 asiento, PVdA cu 9 asiento, Christen Unie cu 5 asiento, Partij voor de Dieren ch 4 asiento, SGP, DENK, 50Plus cu 3 asiento, Forum Democratie, Groep Krol cu 2 asiento y Van Haga cu 1 solo asiento. Na tur tin 150 miembro di Parlamento na Hulanda, contrario na 21 miembro manera nos sistema conoce na Aruba y Corsou por ehempel.

Andre Bosman (55 aña) ta Parlamentario pa e Fraccion di VVD den Parlamento Hulandes. E tin casi 10 aña activo den Parlamento. El a studia na MAVO, HAVO y VWO y tin un propedeuse den politicologia. El a sirbi su pais den Forsa Aereo di Reino Hulandes.

Den su trabounan di tur dia, Andre Bosman ta fiha hopi riba tareanan den defensa Hulandes pero specialmente tambe riba relacionnan den Reino Hulandes. Asina e tin un bos determinante den Parlamento ora ta atende asuntonan di e parti Caribense di Reino Hulandes. E tin hopi contacto riba e islanan y como tal ta sigui desaroyonan di cerca.

Despues di su declaracion, a nota mesora cu “meme” nan a cuminsa sali di tur banda. Por sinti cu for di banda di oposicion ta tilda cu e lo ta referi na Otmar Oduber cu na december ultimo a tuma su retiro for di politica. Di banda di Gobierno (POR) ta insinua cu Bosman lo mester tabata referi na e Gobierno anterior, pues na Benny Sevinger. Por lo menos un ex Minister Presidente a sali suplica Bosman cu si bo bisa A mester bisa B tambe. E ta convenci cu asina e “pandora box” lo bula.

Por sinti cu den seno di varios partido politico y fraccionnan den Parlamento a cuminsa haya temor di na kende Bosman lo ta referi ora e bisa cu pronto un politico lo bay cera den e caso di Serlimar. Sin menciona nomber, pero su declaracion ta bin tras di e realidad cu Serlimar a caba di solicita “surseance van betaling” na Corte pasobra e ta den porta di un bancarota, cu mas debe cu e tin na entrada. No tin duda cu bou maneho di ex Minister Otmar Oduber, e gastonan di Serlimar a redobla, sin cu e entradanan a aumenta.

Sea cual sea e politico cu e ta referi na dje, hecho ta si cu, si locual ta scuchando eyfo ta berdad, cu ta bastante malgastamento di placa y tumamento di decisionnan dudoso (taba)tin den e compania Sui Generis di Gobierno. Mientras cu awo hopi wowo ta riba “e politico”, no por keda sin mira e ultimo directornan tambe y e Huntanan di Supervision, cu (taba)tin e rol di supervisa y controla e compania precisamente pa evita cu ta mal maneha e compania financieramente. Ta nota tambe cu a core cambia e ehecutiva di finansa den Serlimar, sin cu a pone e ultimo hefe di finansa personalmente responsabel pa su maneho den Serlimar.

E forma con e Parlamentario Hulandes a dirigi su mes den pleno Tweede Kamer, a laga hopi interogatorio atras na Aruba. Hopi ta puntra nan mes si e sa mas na Den Haag di locual nos sa aki na Oranjestad. Of kisas awo cu Hulanda ta mandando mas placa pa tene Aruba na bida, cu probablemente nan lo investiga mas ainda riba unda e placa ta bay.

Kisas awo Hulanda lo bay verifica cu na Aruba ta birando normal cu Minister ta haci negoshi cu bufete di abogado di su mesun tata, unda e (taba)ta socio directo di dje. Of cu Minister ta ordena Serlimar pa uza negoshi di siguridad yega na un Parlamentario den coalicion. Hulanda ta bou di e impresion cu p’esey e abundancia na Aruba no ta yega na e pueblo, pasobra ta un grupo so ta gosa di e rikesa cu awor no tin!