E situacion di Fan Fan Sanchez ta uno hopi tristo mes. E anciano di 75 aña ta biba den un situacion deplorabel desde cu su cas a kima mas o menos un luna pasa, na Brikstraat 17, Madiki.
For di momento cu e cos ey a sosode, e unico ayudo cu e ta ricibi ta di un ruman muhe grandi tambe, kende ta dun’e cuminda, pero caminda di biba e anciano di 75 aña no tin. Hopi tristo pa mira cu e cas cu el a biba den dje henter su bida a keda solamente un ruina y den cual e mester a sigui biba pa motibo di no tin caminda di bay. E resto di dia, e ta pasa den un area patras di e cas, drumi riba un spons y un cusinchi.
Ningun instancia no a yega cerca Fan Fan pa dun’e un bida digno na e edad halto asina cu e tin. “Mi ta bon asina,” e mes ta bisa. E ta haya pensioen pero cu esaki e no por haci mucho cos. E tin un cranchi cu e ta uza pa baña y apesar cu e ta bon, e lo tin gana di bay un caminda pa hende grandi, unda nan por cuid’e.
E persona aki mester di ayudo, pa motibo cu e no tin forma di move, ni e luga adecuado pa drumi, mirando cu ta trata di un persona di 75 aña.
