Den e siman di 17 pa 22 di september ta tumando luga e investigacion di composicion di desperdicio na Parkietenbos caminda Serlimar S G conhuntamente cu compania Mott Mac.Donald Limited di inglatera ta conduci e investigacion aki.
E investigacion di composicion di desperdicio ta wordo guia pa sr. S. Daga di Mott Mac.Donald Lmt. Y tambe sra. Stacy Brete di Serlimar Sui Generis. Durante e siman di investigacion lo analisa cinco truck pa dia, cu ta trece desperdicio residencial y comercial. For di cada truck lo saca un “sample” na un forma structura di 100 kilo di desperdicio den ambos categoria cu lo wordo analisa. E proceso di analisis di desperdicio ta consisti di sortia e desperdicio den su categoria y deposita esaki den un bari corespondiente na e tipo di componente di desperdicio. Componentenan di desperdicio ta wordo dividi entre plastic, glas, textil, papel y carton, aluminium, desperdicio di cura y mata y desperdicio organico. Na final di e proceso e desperdicio sortia ta wordo stiwa y transporta pa inglatera caminda esaki ta bai wordo ge-test den un laboratorio di compania Mott Mac.Donald Lmt. E meta principal di e investigacion aki ta pa determina e “caloric value” di cada componente di desperdicio residencial y comercial.
Resultadonan di e investigacion aki lo duna un indicacion di e balor di nos desperdicio residencial y comercial cu lo fungi como guia pa implementa maneho nobo di desperdicio cu e proceso di “Waste-to-Energy” cu ta basa ariba e tecnologia pa produci energia door di kima e desperdicio den “incinerators”.
A yega tempo pa cambia e maneho di desperdicio di Aruba y e motibo principal ta cu Parkietenbos a yega su capacidad maximo cu un haltura di 50 meter cu ta cubri un area di 16 hectare. Serlimar S G su meta principal ta pa introduci un maneho di desperdicio cu ta responsabel y sostenibel cu ta na bienestar di Aruba su comunidad y su medio ambiente. Y pa yega na e meta aki mester cuminsa na e base di e problema cu ta e desperdicio cu ta wordo produci na Aruba.
E trayecto pa mehora nos maneho di desperdicio ta uno largo pero Serlimar S G ta sigur cu ta logra esaki si nos tur realisa cu e situacion actual ta uno desastroso pa nos futuro y e tempo pa cambia esaki ta awo. Hunto nos ta yega na un solucion permanente pa nos problema di desperdicio y e ta cuminsa na nos mes na cas paso e ta nos responsabilidad pa laga un Aruba limpi como herencia pa nos futuro generacion.
