Aña ta habri cu hopi biento, lama bruto y chens pa awasero

Awe Bispo di Aña nobo, Servicio Meteorologico Aruba (Meteo) ta informa cu den proximo 24 oranan no ta spera mucho cambio den e tipo di tempo cu tin awor. Mas nubia lo pasa de bes en cuando cu chens pa poco awasero di duracion cortico. E aviso pa biento duro y lama bruto ta sigui na vigor.

Tempo:
Awe nochi shelo lo ta levemente te parcialmente nubla y generalmente seco. Den oranan di marduga pa Aña Nobo mainta e lo ta parcialmente te brevemente hopi nubla cu chens pa awasero breve.

Temperatura maximo 29 grado celsius
Temperatura minimo 24 grado celsius

Solo lo baha awe nochi 06:25 pm
Solo lo sali mañan mainta 07:01 am

Biento lo ta modera te fuerte for di generalmente direccion oost cu forsa 4 te 6 (20 te 50 km/ora, 11 te 27 nudo). Den dia duro, posiblemente tin bez hopi duro den rafaga cu forsa 7 te 8 (51 to 65 km/hr, 28 to 35 nudo).

Diferencianan di presion di aire den Caribe ta sigui di ta grandi. Biento ta suplando mas duro cu normal pa e motibo aki. Esaki combina cu labaderanan modera for di oost te noordoost lo haci lama basta bruto na cierto partinan di nos costa. Pa e motibo aki tin un aviso pa boto chikito na vigor. E labaderanan lo baha poco poco den curso di e proximo dianan.

Condicion di lama:
Olanan di lama lo ta for di direccion oost cu haltura di 4 te 8 pia cu e olanan di mas halto na costanan oost te noordwest di e isla, caminda e por yega 9 te 10 pia. Ta pidi usuarionan di boto chikito pa bay cu cautela riba lama habri. Un aviso pa boto chikito ta na vigor!

Potencial di awacero pa proximo 24 ora: 1 mm; esaki por varia den area.

Pronostico di tempo pa proximo tres (3) dianan:
Shelo lo ta parcialmente nubla cu localmente un awacero breve. Biento lo ta modera te fuerte for di direccion oost; Den dia duro te hopi duro den rafaga; Temperatura max / min lo ta: 29° / 25°

*Aviso pa boto chikito: Un aviso pa alerta marineronan cu boto chikito pa condicion di lama potencialmente peligroso pa navegacion cu por pasa of ta pasando.

Meteo lo publica e proximo boletin riba diamars 1 di januari 2019 pa 5:00pm.