Sra. Pauletta ta tuma nota di diferente mal informashon tokante e plataforma di enkuentro entre Parlamentonan di Reino (IPKO) ku ta bayendo rònt i kier trese algun aklarashon den esaki.
Reunion ofisial entre e Parlamentonan di Reino ta data for di añanan ’70. E reunion a kuminsá bou di e nòmber Contactplan. Na aña 2006 e nòmber a kambia pa ‘Parlementair Overleg Koninkrijkrelaties (POK)’ i na 2010 a kambia e nòmber pa ‘Interparlementair Koninkrijksoverleg (IPKO)’.
Ku kambio di konstelashon di Reino, a mira kambio den e miembronan di e reunion tambe. Pues Sürnam tabata partisipá den e reunion aki, te ku su salida for di Reino na aña 1975. Den temporada di Antia, Kòrsou tabata partisipá komo parti di e delegashon di Antia Hulandes. For di aña 2010, Kòrsou a kontinuá partisipando na e plataforma aki, komo Pais Outónomo den Reino. Aktualmente ta partisipá na e plataforma di IPKO, Kòrsou, Aruba, Hulanda i St. Maarten.
E reunion di e Parlamentonan ta un plataforma pa un komunikashon direkto i un momento pa krea enkuentro entre e kolega parlamentarionan. Ta e intenshon pa dor di interkambio di informashon, konsulta personal tokante temanan relevante pa kada pais krea mas konosementu i komprondementu di un i pa otro. Tambe yega na palabrashonnan di kolaborashon.
Por nota e balor agregá den entre otro e diskushon di debe di estudio di studiantenan di Kòrsou. E deliberashon nan di IPKO tabatin komo resultado ku a duna inisio ku DUO na final a introdusí un areglo di pago pa un grupo grandi di studiante di Kòrsou. Asina por hasi menshon di otro logronan ku pa medio di komunikashon i interkambio a ser logra. E diferente plataformanan di enkuentro a demostrá nan balor agregá pa Kòrsou na diferente nivel. Reunionnan na nivel di gobièrnu (ehekutivo), nivel di Parlamento (legislativo), nivel di Organisashon No Gubernamental. Esaki ta e sistema nashonal i internashonal di funshoná. Sra. Ana Maria Pauletta di frakshon di PAR ta enfatisá ku dor di komunikashon i interkambio nos ta logra benefisio pa nos pais i esaki ta sosodé riba diferente nivel i plataforma.
