Aña 2018 a cera cu menos caso den Corte

Vice Presidente di Corte Comun di Caribe Hulandes, mr. Sap, hunto cu Persrechter mr. Debby Angela, a repasa e casonan cu Corte a trata na Aruba durante aña 2018. Loke cu a resalta ta cu a atende 37.433 caso na diferente Cortenan riba e islanan durante aña 2018. Esaki ta 14% menos compara cu 2017. E caida aki ta causa principalmente door di 18% menos di casonan penal. Y di su banda e cantidad menos di casonan penal ta debi na menos casonan di “overtredingen”. Na tur Corte, cu excepcion di islanan BES, esaki a baha.

Di otro banda, casonan civil den cifranan total a subi cu 4% y den e categoria Civil, bodemprocedure (incluyendo Arbeidszaken) a subi hasta cu 15%. Den e cifra total, Bestuurszaken a subi cu 8%. E casonan di menos peso, manera infraccionnan (overtredingen) ta hopi pero e cantidad di tempo cu ta tuma pa atende nan ta poco.

E tempo cu ta dedica na e tipo di casonan aki a baha cu un 25% compara cu 2017. E caida a wordo mira principalmente na Aruba, Corsou y Sint Maarten. Na aña 2017 e cantidad di casonan aki tabata hopi halto, debi cu casonan atrasa. E tendencia di caida di e casonan aki tambe por ser mira na Sint Maarten, unda el a baha cu 50% di e totalidad di 2017.

Loke ta resalta den e relato ta cu e cantidad di casonan cu ta wordo considera casonan liviano a aumenta debi na e violacionnan di Ley di Admision y Expulsion cu a bira hopi, cual aumento tabata debi na e situacion politico y financiero na Venezuela. E casonan cu ta tuma un cantidad di tempo averahe, cu no ta ni tiki ni hopi, a keda practicamente igual cu 2017. Asina por ehempel e cantidad di casonan sumario cu a drenta na tur e Cortenan a aumenta y ambtenarenzaken a aumenta specialmente na Aruba.

E casonan cu ta cay den e categoria “zwaar” a baha den cifra total (di tur Cortenan) cu 13%, compara cu 2017. E areanan unda cu si el a subi tabata den bodemprocedure civil (casonan laboral) y casonan di menornan di edad, cu 15% y 24% respectivamente y e aumento ta principalmente na Corsou y Sint Maarten. Na e islanan aki e aumento tabata debi na casonan laboral. Na Sint Maarten esaki a wordo causa door di orcan Irma y na Corsou e causa tabata e aumento di retironan den sector laboral.

Na Aruba e cantidad di casonan considera “zwaar” a baha, door cu tin mas caso a bay pa bodemprocedure civil, unda decision ta wordo tuma den ausencia di e partidonan (si nan no acudi). E casonan aki e ora ta wordo registra como “verstekzaken” y ta bay cay den e categoria di casonan cu ta tuma menos tempo pa atende nan.

Hues mr. Sap den e presentacion a bisa cu nan ta orguyoso cu e cantidad di tempo cu un hende ta spera prome cu su caso bini dilanti, wordo trata y haya un decision. E cantidad di tempo cu esaki a baha en comparacion cu 2017.