Ayera nochi un mama a hiba su yiu Hospital urgente despues cu el a yega cas y haya su yiu muhe viola riba cama. E mama a yama Polis prome, cu a yega e cas situa na Hooiberg y a topa cu un situacion masha lamentabel mes, cu e lakennan di cama na sanger. Polis a actua mesora y a percura pa e victima por yega Hospital mas pronto posibel, mientras cu a sigura e area pa por tin suficiente prueba disponibel pa persigui e sospechoso.
E mucha muhe tin 12 aña di edad y tabata na cas. El a reconoce e violado como pareha di e amiga di su mama. Ta un homber conoci pa e famia y cu sa bin e cas caba. E nunca por a pensa cu e mesun homber aki lo por tin un intencion asina malo cune.
E mama y tata di e criatura ta den proceso di divorcio y separacion pero no ta bayendo facil. Nan ta den un bataya legal den Corte pa haya custodia di e yiu muhe. E proceso ta tumando mas tempo di loke a spera.
Na Hospital a laga haci un “rape kit” cu a sali positivo. A logra haya prueba concreto cu e criatura a pasa dor di un violacion. Awo ta keda pa detene e sospechoso y “match” e pruebanan pa por convence Hues cu ta e homber adulto aki mes a kibra e confiansa den un mucha muhe, kibra su bida y horta su virginidad cu forsa y contra su gana.
Prueba ta importante pa procedura penal
Hopi biaha den comunidad ta protesta contra castigo cu Corte ta impone. Tur cos ta draai rond di e “bewijslast” cu ta mucho poco. Den caso di violacion of abuso sexual, mayoria bez ta un declaracion contra e otro. Pues un mucha ta bisa cu un adulto a abusa di dje mientras e adulto ta nenga rotundamente. Claro den comunidad lo kier pa un Hues kere e mucha y condena e homber sin mas. Mester tene cuenta cu e castigonan pa abuso y violacion tey, pero e prueba ta hopi importante! Pesey e miho cos ta, pa despues di un violacion, yama Polis mesora pa hiba Bo Hospital pa samina Bo y haci un “rape kit” pa por haya sperma of otro likido di e abusado. E prueba aki ta contundente den un procedura penal y lo contribui na un miho investigacion, cu normalmente ta traduci na un castigo mas apropia pasobra Hues tin tur prueba pa traha cune.
Otro caso di violacion na campamento
Fuentenan a sigura nos cu e incidente na Hooiberg ayeranochi no ta e unico caso di violacion di e siman aki. Algun dia pasa caba un mucha muhe di 13 aña a yega Hospital viola. Parce nan tabata campando na lama pa Semana Santa y un conoci a probecha e ocasion y a viol’e. Na Hospital a aplica “rape kit” cu tambe a duna como resultado cu e criatura ta victima di un homber abusado.
Jeugd en Zeden Politie ta investigando
Recherchenan di e seccion di Jeugd en Zeden Politie (JZP) ta encarga cu investigacion di e dos casonan aki. Ta den contacto cu Fiscal di Ministerio Publico cu mester tuma decision pa laga detene e sospechosonan envolvi. Specialmente cu awor Procurador General a cambia su maneho tambe den caso di maltrato y abuso domestico, cu ta laga cera e sospechosonan mesora. Te cu awor nos no a haya confirmacion cu tin detencion den e dos casonan separa aki.
Ayudo profesional pa e victimanan
Den ambos caso di violacion sexual, ta uzando e expertonan di Slachtofferhulp di Cuerpo Policial Aruba pa brinda sosten y asistencia na e victimanan y nan famia. Como cu nan ta menor di edad, nan mayornan tambe ta envolvi den e caso, aunke nan tambe ta traumatisa y yena di rabia cu e sucedido.
Politicamente no tin ningun movecion ainda
Den pasado e actual Minister Presidente, mr. Evelyn Wever-Croes a bisa na mas di un ocasion cu asina e drenta Gobierno, e lo cambia e leynan di abuso sexual, specialmente cu mucha. A bisa cu ta 5 frase mester bin acerca den e ley existente y cu e mes a skirbi e frasenan caba y cu den 6 minuut e ta pasa e ley den Parlamento. Entre otro ta boga pa introduci castigo minimo den e tipo di casonan asina. Te ainda no a scucha nada mas.
Crisis Plan Social cu 35 miyon florin
Gobierno a anuncia un presupuesto separa di 34 miyon florin pa gasta den 2 aña di tempo riba e Crisis Plan Social. Gobierno di Hulanda a inverti 1 miyon florin mas pa yuda Aruba den e esfuerso pa traha riba retonan social riba nos isla. E luna aki a atende un reunion na Parlamento pa indica con e proyecto ta bayendo, e trabounan cu ta haciendo, etc. Parlamento a mustra di a keda satisfecho cu loke a presenta. Hecho ta cu e plan a nace dos aña pasa despues cu un Padrastro a maltrata dos yiu cu consecuencia fatal. A nota cu mas caso di abuso ta continuando, es mas, dunando indicacion di un tendencia di aumento enbes di ta bahando. Algo cu e comision di Crisis Plan Social mester tene bon na consideracion.
