Autor Ogla Buckley a publica e di cinco edicion den locual e ta describi como un serie di desaroyo di e bukinan di Bencho. Diasabra ultimo tabatin firmamento di buki pa un y tur cu ta fanatico di e personahe Bencho. Buckley a conta cu e nomber di Bencho ta aparece den tur e titulonan di e bukinan debi cu e ta e persona principal den ful e serie. Manera menciona, Buckley a describi e serie como uno di desaroyo, na Ingles ta yam’e Coming of Age, esta cu e serie ta sigui e desaroyo di bida di un persona.
Den e serie di Bencho, e prome buki, “Bencho ta dual”, Bencho tin 8 aña, den e di dos “Bencho ta gana un bais”, e tin dies aña, den e di tres, titula “Bencho ta rebeldia”, e tin diescuater aña, den e di cuater, “Bencho y e gran crusada”, Bencho tin diescinco aña y den e ultimo “Ami, Bencho”, e tin diesseis pa diesshete aña. Buckley a splica cu den henter e serie ta cera conoci cu Bencho den su proceso di mucha pa adolescente, e desaroyo di su caracter y mucho mas.
Locual Buckley kier a logra cu esaki no ta solamente laga Bencho crece sino tur e otro personahenan. Fuera di esaki, el a incorpora varios elemento literario, por ehempel, diferente espacio, forma di skirbi y tambe e narador, esun cu ta conta e storia. Tambe Buckley a inclui e idioma di Spaño den e buki tres, ya cu Bencho ta huy bay Punto Fijo y ta intercambia cu e personanan ayanan. E serie di Bencho ta obtenibel na Plaza Book Shop como tambe De Wit & Van Dorp.
