Ta for di luna di mei ultimo caba, Aruba Airport Authority a anuncia cu, despues di hopi tempo di negociacion y deliberacion cu American Airlines, cu na december di e aña aki ta start dos vuelo adicional. A celebra e logro aki den grandi, pasobra e vuelonan adicional ta habri mercadonan nobo y ta trece stoelnan extra pa nos isla como destinacion turistico.
https://www.facebook.com/24ora/videos/214319779503135/
Aruba Airport Authority N.V. (AAA) den presencia di Minister di Turismo, Salubridad Publico y Deporte, Dangui Oduber, e ekipo di Aruba Tourism Authority, e ekipo di American Airlines bou liderazgo di Nelson Cortes, Country Manager pa Aruba, Boneiro y Corsou hunto cu otro invitadonan a celebra e inauguracion di 2 buelo directo pa Aruba: Dallas, Texas y Chicago, Illinois.
American Airlines a lansa 28 buelo den su netwerk di buelo e siman aki, brindando mas oportunidad pa biaha den Merca, Caribe y Sur America. E buelonan adicional aki pa Aruba ta sirbi como conexionnan strategico cu lo conecta e mercado di Aruba cu varios mercado di interes na Merca.
Air Service Development Manager na Aruba Airport Authority, Jo-Anne Arends, a expresa e entusiasmo di Aeropuerto di Aruba pa yama bonbini na e 2 buelonan aki pa Aruba: “American Airlines ta un partner fiel y strategico pa 49 aña caba contribuyendo cu aproximadamente 139 mil pasahero pa aña pa nos isla. E compromiso pa sigui expande e opcionnan di buelo pa Aruba ta admirabel y ta wordo hopi balora door di nos tur. E 2 buelonan a yega net na tempo pa e regalo di Pasco sorpresa pa cualkier pasahero! Nos ta hopi agradecido pa e confiansa di e aerolinea den nos mercado local y nos ta ansioso pa yama bonbini na tur pasahero for di Dallas y Chicago pa Aruba!”
E festividadnan pa e celebracion inaugural a inclui un muestra di aprecio pa tur pasahero na ora di yegada, sigui pa e ceremonia oficial teni den e VIP-Room di Aeropuerto y e bolo tradicional, pero moderno como un highlight di e anochi.
