Ambos sospechoso di bom melding riba Southwest den libertad

E dos muhernan Mericano cu a keda deteni despues di e alarma di bom riba Southwest ta bek den libertad. Nan a pasa ariba cu nan no a haci e acto aki. E tripulacion di e avion mes a faya den cierto sentido. For di momento cu nan a haya e mensahe den banjo mester a seal e banjo pa evita su uso. Esey nan no a haci. Ademas a mishi cu e saco unda e mensahe a wordo poni. E tabata den banjo parti dilanti di e avion. Asina mas hende mishi e papel unda e mensahe ta, por kita cualkier evidencia unico cu por tin riba e saco. E dos muhernan durante interogacion no tabata sa kiko a sosode exactamente. Nan tabata esnan indica pa pasaheronan cu a miranan drenta banjo. Esey tambe nan a admiti durante interogacion. Hasta nan lo a haci uso di e banjo patras y e banjo dilanti. Kiermen durante e vuelo aparentemente nan a usa e banjo mas cu un biaha. Den un di e biahanan faltando poco pa avion baha, hasta e purser parce a hiba un di nan na e banjo dilanti. Pesey mes e cos tabata basta bruha riba e avion mes na e forma cu nan a atende cune. Despues di interogacion di oranan largo, a bay over na detencion di ambos y a pasa e prome anochi den dos diferente warda sera den cel. E diabierna a pasa un biaha mas e proceso di interogacion. Finalmente a bin tende cu ambos a wordo laga den libertad. Ningun biaha durante e interogacion e dos muhernan a admiti di a scirbi cualkier mensahe di bom y laga atras den e banjo. Varios hende a usa e banjo hasta despues di descubri e papel cu e mensahe y aki ta caminda e tripulacion a faya. Mientrastanto e capitan no a confia mas di bolbe Merca cu e avion y pesey mes e avion a pasa un anochi na Aruba. E capitan si mesun anochi a bandona Aruba riba otro vuelo. Un otro crew cu a bin Aruba a aborda e avion y asina a bolbe cu esaki Merca diabierna atardi pa anochi. E dos muhernan aki a scapa di un demanda basta pisa si a prueba cu nan ta culpable.