Amaurys Montes: Famoso Parillero di El Gaucho a fayece di kemaduranan

10966

Un accidente lamentabel cu a tuma luga diasabra mainta a kita bida di Amaurys Montes awe merdia. Cu kemaduranan practicamente tur caminda di su curpa, a transporte e victima cu maximo urgencia pa Hospital pa asina cuminsa trata su heridanan.

Por a compronde cu e victima lo a haya dos infarto durante e dianan siguiente pa despues drenta coma. Su estado a keda deteriora y dokter a informa famia cu e victima lo a drenta estado vegetal, e ta “klinisch dood” y cu no ta keda nada otro cu kita mashin for di dje.

Famia a keda cu speransa, sinembargo a combersa cu specialista, kende a splica nan delaster un detaye di e situacion penoso den cual Amaurys a keda aden.

Por a compronde cu e accidente aki lo tabata un descuido na momento cu e lo a bay cende un BBQ pit y tira fuel riba esaki, mientras e tabata tin un celular den su man. 

Un explosion a surgi caminda cu e victima lo a ricibi kemadura na casi full su curpa, el a lora su mes den santo y paga e candela. Pero e daño tabata enorme. A transporte cu urgencia pa tratamento pero lamentablemente awe mainta ta drenta informacion cu Amaurys Montes a perde su bida den e caso lamentabel aki.

Tristo ta cu Amaurys a fayece haciendo loke tabata su trabou y su hobby: parillada.

No solamente e tabata un empleado di El Gaucho, pero tabata como un miembro di e famia, mirando e cantidad di añanan cu e tin trahando. E noticia a laga henter e famia di El Gaucho y clientenan fiel di e restaurant den un tristesa grandi.  

Na famia y coleganan di e fayecido ta bay nos mas profundo palabra di condolencia.