AMA ta urgi pa no lubida riba yiunan di tera den e combate di COVID-19

344

Dia 13 di maart 2020 nan a constata e prome caso di pacient cu corona-virus na Corsou. Gobierno local y expertonan, manera dr. Gerstenbluth, a tuma medida di prevencion inmediatamente. Ta informa pueblo frecuentemente di e desaroyonany e medidananpa medio di diferente ruedanan di prensa. Te cu awor Boneiro, Saba y St. Eustatius no tin niun caso di COVID-19. Awe 17 di maart nan a constata e prome caso na e parti Hulandes di e isla St. Maarten. Prome cu esaki tabatin dos caso conoci na e parti Frances di e isla. Na Aruba dia 13 di maart ultimo a constata dos caso di COVID-19 y e di tres caso riba 16 di maart. E instancianan concerni tambe a tuma medidanan necesario directamente pa preveni cu e malesa ta sigui plama.

Como reaccion riba e infeccion creciente den Europa y cu e entrada di COVID-19 riba nos islanan, a dicidi pa para tur traficacion aereo for di Europa te un proximo aviso. Den un comunicado oficial di parti di gobierno di Corsou ta indica cu ta admiti solamente habitantenan cu ta na Europa, cu excepcion di algun grupo manera specialistanan medico y profesional den cuido. Den cuadro di e informacion aki Asosiashon Médiko di Antias (AMA) ta pone su mes disponibel pa yuda pensa riba e posibilidadnan pa trece personal for di Hulanda den caso cu presenta e necesidad pa yudansa adicional den cuido na e islanan Hulandes den Caribe. E situacion den Europa ta pone cu nos ta mira e necesidad pa actua na tempo y tuma medidanan preventivo. E team di calamidad ta riba bon caminda caba,  pero por pone e capacidad di cuido bou di presion den caso cu e crisis di COVID-19 manifesta su mes di e mesun manera cu Europa.

“AMA ta consisti di sigur 200 profesionalnan den e area di medicina cu ta bini for di Aruba, Boneiro, Corsou, St. Maarten, Saba y St. Eustatius. E asociacion ta consisti entre otro di dokternan, boticarionan, studiantenan di medicina y farmacia, dentista y otro profesionalnan den e sector di salubridad. E miembronan aki ta bibando na Hulanda, pero apesar die distancia, ta sinti nan mes parti di e desaroyonan riba nos islanan y kier yuda activamente cu esaki”, ta palabranan di Thaïs Tong, president di e asociacion.

Diadomingo 15 di maart 2020 AMA a haci un yamada na tur profesionalnan den e sector di salubridad pa inventarisa nan disponibilidad den caso cu haci un apelacion pa duna contribucion pa combati un brote riba nos islanan. Esaki a resulta den reaccionnan positivo y te cu awor aki tin mas cu 60 profesionalnan registra. Banda di esei e gobernantenan local y hospitalnan ta na altura di nos proyecto. “Minister President di Aruba, sra. Evelyn Wever-Croes a indica di ta contento cu nos coperacion y yudansa y a duna di conoce di tuma contacto directamente cu nos den caso cu tin mester”, segun Aveline Figaroa, vice-president di asuntonan externo di AMA.

E asociacion ta sumamente contento cu e reaccionnan cu a drenta te na e momentonan aki y kier a enfatisa na e hospitalnan y gobernantenan local pa tuma e proposicion na serio di manera cu por yega na un plan. Den un comunicado recien encuanto e situacion na Aruba tabatin un declaracion di sra. Sharline Koolman di  Directie Volksgezondheid, cu no por haya yudansa facil for di Hulanda den forma di  personal, mirando e situacion cu Hulanda mes ta confrontando.1 Aparte di esei, den algun hospital na Hulanda a para algun intercambio di personal cu tabata plania pa bin nos islanan. Riba esaki a sera e fronteranan cu Colombia como prevencion, cual tin tambe como consecuencia cu transporto di pacient pa Colombia tampoco ta posibel. “E desaroyonan aki ta enfatisa e echo cu tin mester di nos contribucion como yiunan di tera pa yega na un solucion den caso cu nos islanan no por conta cu profesionalnan for di Hulanda via di e camindanan di salubridad existente”, segun Stephany Archangel-Krips, tesorero di AMA.

AMA ta brinda un solucion creativo den caso cu surgi scarsedad. Nos a brinda e posibilidad na e profesionalnan di conoce di ki manera nan ta disponibel. Riba e formulario di inscripcion por indica di cua manera ta disponibel pa yuda, sea na e islanan of riba distancia como intermediario na Hulanda. “Nos ta disponibel pa yuda pensa na posibel solucionnan y duna yudansa personalmente na nos islanan cu e diferente tareanan. Esakinan ta encera “triage” na dokternan di cas, atende yamadanan y duna asistencia na e diferente instancianan (manera hospitalnan y GGD), duna informacion na comunidad, haci e diferente testnan caminda ta necesario”, segun Thaïs Tong. E asociacion ta spera cu e medidanan tuma na e momentonan aki ta evita un brote y cu e casonan no ta surpasa e capacidad di cuido. Nos kier enfatisa cu nos islanan por conta riba nos sosten, aunke nos ta na Hulanda!Fuente:
1. Henriquez, S. (2020, 15 maart). Aruba weert alle vluchten, ook van Caribische eilanden. Lesa riba 16 maart 2020 via https://caribischnetwerk.ntr.nl/2020/03/15/aruba-weert-alle-vluchten-ook-van-caribische-eilanden/

E mensahe cu e asociacion a manda pa tur profesionalnan por meld nan disponibilidad.

Comments

comments