Alvin Molina (MEP): “Siguridad riba nos isla ta hopi mas cu djis gara ‘boef’ y cera nan den KIA”

Den un conferencia di prensa cu a tuma luga awe mainta, parlamentario pa fraccion di MEP, Alvin Molina a adresa e preocupacionnan cu ta reinando ultimamento pa loke ta siguridad rond di nos isla. Pa esaki el a señala specificamente na e actonan penal cu ta tumando luga bou di e hobennan of menornan di edad.

El a specifica cu tin tres aspecto cu ta resalta, prome ta den e actonan castigabel mes, cu ta afecta trankilidad y nos unico pilar economico, di dos ta cu hopi biaha esakinan ta cometi pa hoben of menor di edad y e di tres punto ta cu mester busca un manera pa trata e hobennan cu comete e tipo di actonan aki.

Pa loke ta e parti di e frecuencia di crimen bou di hoben of menor di edad, Molina a puntra ki señal esaki ta dunando na nos comunidad y unda nos por mehora esaki. Pues, segun e parlamentario, mester puntra dicon e muchanan ta desaroyando di tal forma cu nan ta bay den mal caminda. Pa esaki el a señala na situacion social, situacion familiar, di enseñanza, den bario mes of deportivo y hasta actividad cultura cu por contribui na siguridad. “P’esey tur ora mi ta bisa y mi lo sigui enfoca riba esaki, siguridad riba nos isla ta hopi mas cu djis gara boef y cera nan den KIA.”

Pa un relato mas amplio, lesa edicion di TREMPAN