Alvin Molina (MEP): No por tin progreso si e departamento di Gobierno no ta funciona

Nada nobo, pero bon cu poco poco diferente Ministerio ta realisando cu Aruba no por progresa si nos departamentonan di gobierno no ta funciona manera mester ta. Inversionistanan local of internacional, grandi of chikito, ofreciendo un variacion di producto y servicio, tur tin mester di un localidad pa por eherce nan negoshi. Na Aruba lastimamente a bira un custumber cu ta casi imposibel pa logra un tereno y asina contribui na economia. Prome cu bo entrega e peticion mes caba bo tin e expectativa cu bo lo no logra keda cla. Pa añas bo ta keda den un incertidumbre, sin haya un contesta, niun reaccion den cualkier forma. Door di esaki, e ciudadano ta frustra, ta haya stress, mientras cu bo no logra nada aunke cu bo a cumpli tur e rekisitonan. 

Tur esaki cu consecuencia cu inversionista no ta tuma Aruba na serio pa cuminsa nan negoshi, ta perde confiansa den nos pais, Aruba ta perde oportunidadnan pa entrada y cupo nan di empleo.

Durante reunion publico, tratando presupuesto 2023, Parlamentario Alvin Molina a haci e Minister di Economia e pregunta ‘ki obstaculo tin cu ta stroba nos economia di desaroya?’. E contesta ta “loud and clear” ‘DIP’! Kisas dia bieu por a hisa, benta, bolter, tanten cu drecha e servicio na pueblo. 

Di otro banda esaki lo por causa cu ta daña e investigacion di Ministerio Publico, perdiendo tur e esfuerso pa haya sa kico a bay robes cu terenonan di pueblo y ken mester para responsabel pa esaki. 

P’esey, aunke ta frustrante pa hopi hende aki na Aruba, mi ta compronde e situacion cu nos Minister di Infrastructura ta haya su mes confronta cune. Na bienestar di economia di Aruba, un solucion mester bin pronto.