Entrante 2008 Kòrsou ta selebrá Dia di Alumno lokal riba 21 di yanüari.
Gobièrnu a proklamá e dia aki komo “Dia di Alumno” pa asina duna ékstra atenshon na nos alumnonan ehemplar.
21 di yanüari ta fecha natal di Endrew Isabella, un alumno ehemplar ku a destaká den tur lokual ku ela hasi. Apesar di Endrew su malesa króniko, semper ela keda positivo i lucha pa bai dilanti. Lamentablemente Endrew a pèrde e bataya, pero te ku awe nos ta selebrá su bida i e leyenda ku ela laga atras pa nos.
Riba Dia di Alumno nos ta keda konmemor’é di un forma speshal.
E aña aki Minister di Enseñansa, Siensia, Kultura i Deporte (ESKD), sra. Marilyn Alcalá-Wallé a bishitá alumnonan di V.S.O. – Z.M.L.K. Marieta Alberto. A inisiá e mainta ku kanto di himno. Minister Alcalá-Wallé a hiba un palabra di elogio na e alumnonan i maestronan pa e forma positivo ku nan ta traha riba edukashon di e hóbennan.
Den luna di dèsember 2018 e alumnonan a ehekutá un bunita proyekto di “Generosidat” kaminda nan a bishitá e Ministerio di Enseñansa, Siensia, Kultura i Deporte i Minister Marilyn Alcalá-Wallé i tambe kas di ansiano, pa asina duna bèk. E alumnonan huntu ku nan maestronan a prepará kos di boka dushi i den un esfera ameno a kompartí ku komunidat. “Kaminda tin gratitut kosnan maravioso ta sosodé” segun maestronan di V.S.O. – Z.M.L.K. Marieta Alberto.
Komo muestra di gratitut pa nan dedikashon, perseveransia i positivismo, Minister a duna atenshon speshal na e skol akí. Minister a pasa di klas pa klas, pa sera konosí ku e gruponan. Minister i su kolaboradornan a keda deleitá dor di e alumnonan ku a sirbinan ku hopi dedikashon. Tin un positivismo i alegria úniko ta reina na V.S.O. – Z.M.L.K.
Tabata un momentu emoshonante ora e hóbennan a risibí nan sertifikado serka Minister.
Tambe e maestronan a risibí un botón di “No Child Left Behind” komo símbolo di rekonosementu pa nan trabou balioso. E meta di inklushon di tur alumno mester kondusí na un dado momento na 0-drop out. Esaki ta nífiká alabes “No Teacher Left Behind”. Tin hopi trabou i reto i no por laga ningun maestro i tampoko alumno atras.
Ku orguyo por konfirmá ku alumnonan di V.S.O. – Z.M.L.K. Marieta Alberto ta alumnonan ehemplar!
Un felisitashon ta bai na tur alumno awe riba Dia di Alumno. Ku positivismo i determinashon nos ta logra!
