Scol basico Prinses Amalia a tene nan jump up di Carnaval, unda cu alumnonan di 1ste te cu 6de klas a disfruta di un mainta bailando dushi canticanan di carnaval. E parada a bay den gran forma, e muchanan a baila y gosa. E ruta no tabata demasiado largo ni cortico.
Segun Alvaro Maduro, docente di movecion y salud di Prinses Amalia, a tuma nan algun siman di preparacion y organisa door di e team. E aña aki e scol tin un comision di 4 cu ta consisti pa juffrouwnan Mireya, Gina, Norma y meneer Alvaro. E comision a traha hunto cu e otro docentenan y mayornan.
Cada un a bin cu un tema y pone e ambiente riba caya. E intencion ta pa haci e parada di scol cada aña un tiki mas grandi. Tambe ta pa hinca e smaak den e muchanan pa participa den parada no di scol so pero esun di caya tambe. Desde cu Prinses Amalia ta den un localidad nobo, esaki ta di 2 aña cu nan ta organisando e parada. Den pasado e scol tabata organisa eleccion di reina y parada.
