Altocomisario di Polis, Andrew Hoo, den un video graba y publica riba e pagina di Facebook di Cuerpo Policial Aruba cu 25 mil “likes” pero video mira solamente pa 631 usuario, a bisa cu el a tuma nota riba social media cu tin diferente menasa, incluyendo menasa di morto dirigi na Cuerpo Policial Aruba. ”Como Altocomisario di Polis MI NO TA TOLERA esaki”, asina Hoo a bisa cu un cara serio un rato pasa.

El a sigura di ta trahando hunto cu Ministerio Publico pasobra e no ta acepta ningun menasa contra Polis. ”Nos Polisnan ta eherciendo nan trabou debidamente pa mantene orden publico di nos pais. Cada Polis ta sali tur dia for di su cas pa haci nan trabou di tur dia, nos NO ta acepta cu Polisnan lo traha bou presion di un hende of di ningun menasa ni di morto. Mi kier pa esaki ta un mensahe cla y fuerte pa tur personanan cu tin mal intencion contra Polis”.

Tambe por a tuma nota cu websitenan di noticia local ta creando nan mesun noticia y bayendo direccion contrario di e realidad. Informando comunidad robes di loke ta hechonan cu a sosode. A tuma nota cu awemainta a tuma lugar un incidente na unda un brommer Harley Davidson tabata involucra. Un website di noticia a menciona cu Polis no mag di persigui un brommer. Na ningun momento Mando Policial a emiti un informacion na su Polisnan cu tin un cambio den maneho di persecucion, e noticia cu e website aki a duna ta incorecto y no ta cuadra cu berdad.

“Tin un maneho por estricto den nos organisacion pa loke ta trata persecucion. Cada Polis ta dicidi si e ta persigui e momento ey. Si e manehador di cualkier vehiculo dicidi di no para y no sigui ordo di autoridad e por tin consecuencia pa ambos partido. E manehador mester ta consciente y sigui ordo di Polis. Si polis bisabo para BO MESTER PARA! E momento cu e manehador dicidi di core pa Polis, e desicion ta den su man pa e consecuencia cu lo bin despues. Nos tin ley y reglanan cu nos mester mantene na dje y Polis mester cumpli cu nan. Si no tin ley ta bira free for allriba nos pais”, di acuerdo cu Altocomisario Andrew Hoo.

Cada persona mester ta responsabel pa nan actonan y loke wordo publica riba rednan social tambe ta conta. Tin un diferencia grandi entre bo opinion y menasa di morto. Na cua parti di mundo cu bo ta y bo menasa via rednan social e.o. facebook bo por wordo persigui.

Cuerpo Policial tin su departamento capacita pa haci investigacionnan interno cu ta regarda nos organisacion policial.

Por ultimo loke ta trata e incidente cu a sosode na Seroe Patrishi. Cuerpo Policial a emiti un comunicado di prensa pa informa comunidad cu tin un investigacion andando pa cu e caso. Nos a tuma nota cu riba website di noticia local cu ta menciona cu ta investigando un polis. Esaki no ta cuadra cu e berdad. (Nota di redaccion: Si KPA informa cu ta investigando e persecucion riba brommer, ta ken Boso lo investiga? E Polis trahando na San Nicolas of e recherche di Noord? Claro cu ta esun envolvi den e persecucion y ningun otro! KPA mester para pa e relatonan cu nan mes manda. Si no ta sigur ken ta investigando, no manda nada pa bruha e pueblo mas di loke nan ta bruha caba pa e ultimo acontecimientonan den y rond di Cuerpo Policial)

Comunidad por sigui confia den su organisacion policial. Nos tin profesionalnan cu ta traha pa mantene seguridad di nos pais 24/7. For di esun di mas hoben te cu e rango di mas halto. Cuerpo Policial Aruba ta para pa seguridad, servicio, integridad, vigilancia y disponibilidad.E pueblo mester por sinti su mes sigur y mester por conta cu e experticio, ayudo profesional y e profesionalismo di nos organisacion policial.

Comments

comments