Entrante dialuna dia 22 di augustus, no por tira taira na dump mas, den un esfuerso pa cada bes limita e oportunidad di candela descontrola riba e landfill. A yega na un acuerdo pa entrega taira na Ecotech cu lo procesa e taira pa despues Carentra recicla e taire den produccion di diesel. Pero, ta considera taira mescos cu desperdicio, di cual ta cobra Afl. 190 pa ton, cu ta encera un averahe di mas o menos 3 florin pa un taira normal di auto chikito.
Darral Erasmus, propietario di Jay’s Tire Shop, a bisa cu nan no ta para solamente p’e tire shopnan, pero pa pueblo di Aruba. Aña pasa den luna di september nan tabata paga Serlimar solamente 15 florin pa ton di taira ora tira afo na dump. Den luna di october esaki a bira 60 florin. Dia 22 di juli ultimo, Minister Ursell Arends a indica cu desde 22 di augustus mester paga 240 florin pa ton di taira na EcoTech. El a indica cu esey ta un aumento di 400%, pesey nan a sinta tres siman pasa. Aki a trece e punto dilanti cu nan no ta di acuerdo ta subi asina hopi den un solo biaha, di 60 pa 240 ta 400%. Nan a sinta bek cu nan stakeholders dos siman pasa y awo a bin c’un prijs di 190 florin pa ton.
Diaranson un grupo di tire shop a reuni y no tabatin un solucion concreto, aunke a lansa varios pregunta na e mandatario. Erasmus a sigui splica cu diahuebs e asociacion di tire shop a sinta y a yega na e decision cu entrante dialuna awo nan no ta tuma taira mas. Lo cambia taira pa cliente pero cu e cliente mes tin cu bay cu su taira y mira con e ta deshaci di dje, entre otro door di hib’e Ecotech of Carentra na Barcadera.
Darral Erasmus a splica con e proceso ta ora di hiba e taira na EcoTech, unda cu nan ta kibra e taira na pida pida chikito y ta hib’e Carenta. Aki Carenta ta traha cu e taira y ta combirtie den fuel oil. E oil fuel aki den pasado nan a bende cu diferente laundry na Aruba, pero nan a stop esey, el a expresa. Den e reunion di diaranson ultimo nan no tabata sa kico pa haci cu e producto. Asociacion di bendedonan di taira a bin cu e idea di por ta bend’e cu Colombia of haci algo cu nan y asina ey por gana algo di e tairanan. El a enfatisa cu desde dialuna awo tire shopnan miembro di nan asociacion lo cambia taira pa cliente pero manda e cliente mes cu e taira bek.
Pa loke ta e prijs pa ton di taira, Darral Erasmus a splica cu a baha e prijs na 190 florin, pero e tire shopnan ta mira e resultado di e size manera di scooter te size 14 tin di paga 5 florin pa taira. Aunke cu prijs pa taira chikito ta start na 3 florin pa taira, pa loke ta e tairanan di SUV, size 16 te 20, tin di paga 9 florin na cada tire shop, mientras taira di truck ta 25 florin pa cada un. Segun Erasmus, nan ta biba e dolor di pueblo. E mes ta deal cu mama soltero, tata soltero, 60+ y mirando e situacion cu awa y coriente ta bay subi, gasolin ta fluctua pero depende prijs di petroleo.
Su punto ta cu nan no kier pone mas presion riba esunnan cu ta den mas necesidad. “Nos cu ta bende taira second hand, ta mira e dolor di esunnan ey. P’esey ta para awe pa e pueblo”, el a expresa.
TAIRA TIRA ROND
E accion aki por tin repercusion pa medio ambiente, unda por haya taira tira den mondi. El a bisa cu esey ta un duele cu nan tin, pasobra e decision aki no tabata facil pa nan. Nan sa cu tur ta Aruba, pero su persona personalmente no kier pa ningun hende tira nan taira den mondi. No ta bunita pa tin un medio ambiente cu taira benta rond. E kiermen esey ta un duele cu nan tur a papia riba dje.
