Mayan mainta Alexander Jeremy Jonathan Ras di 22 aña di edad ta presenta dilanti Hues pa responsabilisa su mes pa un caso hopi serio: Asesinato. E hecho aki a tuma luga diaranson dia 7 di november 2018 na Dakota y cu a wordo cubri ampliamente pa 24 ora.com. Un serie largo di casonan di discusion, maltrato o sea violencia domestico, tabatin un final fatal. E victima Juraima Wouters, un dama di 34 aña, kende a ricibi varios hinca na su curpa y di tal indole cu no por a salbe door di e hemoragia cu el a sufri.

E sospechoso awor ta acusa di asesinato y si esey no keda proba, di maltrato severo cu morto como consecuencia y diferente acusacionnan subsidiario cu ta wordo poni pa di un forma of otro e keda condena. E acusacion oficial ta cu riba 7 November 2018 intencionalmente el a hinca e dama Juraima Wouters (34) cu un multitool den pecho, cu consecuencia cu e dama a fayece.

Den e caso di violencia domestico unda cu Anushka Tromp a perde su bida, e homber Roy Croes a wordo condena na 7 aña di prison. E diferencia di e caso aya cu esaki ta cu esun di Anushka tabata un pelea cu maltrato, mientras cu den e caso aki, ta parce cu e actuacion di acusado ta indica cu el a actua intencionalmente, pasobra el a coy e arma (algo di punta) pa hink’e y haciendo esaki e tabata sa cu e por mat’e. No tin otro caso di violencia domestico reciente cu ta similar na esaki pa haci un comparacion di loke e castigo por, y tambe ta depende si ta prome biaha e acusado aki ta haya su mes envolvi cu husticia y casonan di violencia.

Ley ta bisa cu castigo maximo pa actuacion premedita ta 30 aña of bida largo, o sea cu e acusado mester a traha e plan adelanta, cu detayenan di kico e ta bay haci y con. Den e caso di Ras esey no ta e situacion. E ta mas bien si a actua intencional y pa esaki e castigo maximo, segun leynan di Aruba ta 20 aña.

Si ta demanda un castigo di 20 aña ta depende di e circumstancianan cu Fiscal haya pa trece dilanti cu lo por yega na un demanda asina. Hopi biaha no ta yega na e demanda maximo si e acusado por ehempel ta prome biaha ta haya su mes envolvi den un caso di e indole aki. E tratamento di e caso di Ras ta cuminsa pa 10.30 di mainta.

Comments

comments