Alex Schwengle: A firma un LOI cu Ministernan di Corsou y Sint Maarten

121

Recientemente Minister di Salud Publico, Cuido di Nos Grandinan y Deporte, Dr. Carlos “Alex” Schwengle, tabata na Corsou unda cu el a reuni cu Minister di Salud Publico, Desaroyo Social y Labor, Emil Lee di Sint Maarten y Minister di Salud Publico, Medio Ambiente y Naturalesa, Suzanne Camelia-Römer di Corsou. Durante e encuentro aki nan a trata e topico di volksgezondheid. Cada minister a splica kico ta nan vision pa cu salud publico. Na final di e reunion Ministernan a firma un LOI, “Letter of intent”, pa asina por sigui traha hunto mas di cerca pa asina tin un miho salud publico.

 

E reunion a bay bon unda cu tur minister ta di kere cu e 3 islanan por traha hunto riba e terenonan di salud publico. Minister Schwengle ta contento di por traha cu ministernan di Corsou y Sint Maarten pa asina mehora salud publico. E ministernan lo bay presenta e top 3 prioridad riba tereno di prevencion, algemene ziektekostenverzekering y ziekenhuiszorg, unda cu lo mira con e 3 islanan lo por traha hunto.

Minister di Lee a indica cu e lo kier pe programa di “biba amor” keda implementa. Tambe e seguronan medico a papia riba e parti con pa tin un cuido “slimmer/goedkoper”.

 

Ministernan a tuma diferente punto den consideracion pa asina nan por traha mas di cerca hunto. Algun punto di consideracion ta e disposicion di desaroya un cooperacion entre e 3 islanan den e tereno di salud y cuido medico, considera e importancia y conocemento di e balor di cooperacion entre e participantenan pa sigura un enfoke riba e importancia di salud publico manera pa preveni enfermedadnan no transmisibel, tuma nota di e protocol di e cooperacion di salud publico di Reino Hulandes firma pa gobiernonan di Hulanda, Aruba, Corsou y Sint Maarten na September 2016 y otro consideracion.

 

E participantenan tin e plan pa expande e cooperacion riba areanan di interesnan mutuo. Te cu awo nan a yega na e prome topiconan di interes mutuo cu ta coordina hunto proyectonan den e area primario di prevencion den cuido, pa aumenta esfuerso mutuo ora di trata retonan grandi, pa den e proximo 3 luna traha riba e “Terms of Reference” pa e comision di audit di cuido integral cual ta consisti di partnernan internacional cu ta traha pa un solo vision y hopi mas. Tur e topiconan menciona por extende den varios topico mutuo. E ministernan lo reuni un biaha mas hunto pa sigui traha pa tin un bon cuido integral. Mimister Schwengle tabata compaña pa director di IMSan; AZV; Hospital; WGK y  IVA.