Alerta pa biento fuerte diasabra

Departamento Meteorologico Aruba (Meteo) a emiti un alerta awe diabierna 6:00pm pa biento duro, cu ta drenta na vigor for di diasabra 20 di Januari 2018 pa 6:00am y cu lo keda efectivo te proximo aviso. Ta pronostica cu henter Aruba lo ta afecta pa e situacion di tempo aki.
Synopsis:
Un area di presion halto riba ocean atlantico, combina cu un area di presion abou noord di Colombia lo mantene diferencia grandi di presion den Caribe. Durante proximo dianan lo produci biento fuerte te hopi duro cu rafaga.

Biento lo supla cu mas o menos 20 te 25 nudo y ta anticipa cu lo tin rafaga cu por yega te 35 y na dado momento kisas te hasta 40 nudo (beaufort 8).

Accion di precaucion:
Ta urgi usuarionan di lama pa tene cautela riba lama. Mara obhetonan cu ta los pasobra nan por bula rond dor di e biento fuerte. Turistanan no mester bay leu den lama, specialmente entre banda costanan parti oost te noordwest. Tambe mester ta alerta entre waf y Manchebo Beach Hotel.