Diadomingo anochi, e buelo di KLM cu a yega for di Hulanda, a pasa Aruba prome cu e sigui pa Boneiro. Na Aruba e avion a pasa di transito, caminda cu mester a baha pasahero y pasaheronan nobo mester a subi e avion pa sigui nan destino, cual ta Boneiro.
Dado momento e homber Boneriano UH Gravenhorst, kende tabata abordo cu su dos yiunan, uno biba na Hulanda y un otro biba na Boneiro, door cu e avion a cuminsa tarda, a cuminsa grita den e avion cu e tin un bom y e tin un arma di candela cun’e.
Mesora a activa autoridad y a detene e sospechoso y a cuminsa cu investigacion grandi. A bay cun’e for di aeropuerto hib’e warda. Na Aeropuerto mester a baha tur cos for di avion, pasa cacho, listra, tur cos pa posibel arma y bom cu e homber a bisa cu e lo tabata tin abordo. No a detene e yiunan, di cual uno ta menor di edad. Nan a sigui pa Boneiro. E tata si a keda deteni na Aruba. Y tur cos pa motibo cu e vuelo di KLM a tarda.
Mientras tanto mester a desvia avionnan pa Corsou atrobe, pa motibo di e caso aki KLM mester a sali 7’or y 10 di anochi y tabata tin varios ora di retraho pa e motibo di e bommelding aki.
Cuerpo di Bombero, K-9 unit y polis a wordo activa di biaha pa motibo di e caso aki. Algun siman atras tabata tin un caso di un señora cu riba vuelo di Tui, kende ta canando rond na Aruba, causando masha problema. Mas cu un biaha el a causa problema, te cu polis mester a bay p’e. Nan a detene pa algun dia y lag’e bay. Ainda e ta na Aruba ta cana rond.
